އިބްރާހިމް މުހައްމަދު ސޯލިހްގެ ސަރުކާރުގައި ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީންގެ ޕާސްޕޯޓް ހިފެހެއްޓި އަމުރު ބާތިލްކުރަން އޭނާގެ ފަރާތުން ހައި ކޯޓަށް ހުށަހެޅި މައްސަލަ ބަލައިނުގަތުމަށް ހައި ކޯޓުން ނިންމައިފި އެވެ.

އަކްރަމްގެ ޕާސްޕޯޓް ހިފަހައްޓާފައި ވަނީ ބިންވެރިޔާ ސްކީމްގެ ދަށުން ގޯތި ލިބެން ނުޖެހޭ ބަޔަކަށް ގޯތި ދިން މައްސަލައާއި ގުޅިގެންނެވެ.

ހައި ކޯޓުން އިއްޔެ މިގޮތަށް ނިންމީ އެ މައްސަލައަކީ ދަށު ކޯޓަށް ހުށަހަޅައިގެން ބަހުސްކޮށް އަދި މުރާޖާ ކުރުމުގެ ފުރުސަތު އޮތް މައްސަލައަކަށް ވާތީ ކަމަށް ހައި ކޯޓުގެ ރަޖިސްޓްރާގެ ނިންމުމުގައިވެ އެވެ.

Advertisement

ބިންވެރިޔާ ސްކީމް މައްސަލާގައި ފުލުހުން ކުރަމުންދާ ތަހުގީގަކަށް މިދިޔަ އަހަރުގެ ޑިސެމްބަރ 20 ވަނަ ދުވަހު ކޯޓު އަމުރެއްގެ ދަށުން އަކްރަމްގެ ޕާސްޕޯޓު ވަނީ ހިފަހައްޓާފައެވެ. އަކްރަމްއަކީ ކުރީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ބިން ދޫކުރުމަށް އުފެއްދި ހާއްސަ ހައުސިން ކޮމިޓީގެ ޗެއާއެވެ. 

ފުލުހުން މިހާރު ތަހުގީގުކުރަމުންދާ ބިންވެރިޔާ މައްސަލާގައި އަކްރަމް ވިދާޅުވެފައިވަނީ، ބިންވެރިޔާ ސްކީމުން އުސޫލާ ހިލާފަށް ގޯތިދިން މައްސަލަ ބެލުމުގައި ފުލުހުން ވަރަށްބޮޑަށް ސިޔާސީވެފައިވާކަމަށެވެ. މި މައްސަލާގައި އަކްރަމް ކަމާލުއްދީން ވިދާޅުވެފައިވަނީ ބިންވެރިޔާ ސްކީމުން ގޯތި ދިނުމަށް ކުރީ ސަރުކާރުން އުސޫލާ ހިލާފަށް އެއްވެސް ކަމެއް ކުރިއަށްގެންގޮސްފައި ނުވާނޭ ކަމަށެވެ.