އިޖުތިމާޢީ އަދި އާއިލީ ތަރައްޤީއާއި ބެހޭ ވުޒާރާގެ  މުވައްޒަފުންނާއިމެދު ގޯސްކޮށް ކަންތައްކުރި ކަމަށް ސިވިލް ސާވިސް ކޮމިޝަނުން (ސީއެސްސީ) ނެރުނު ރިޕޯޓުން ނުދައްކާ ކަމަށް އެ ވުޒާރާގެ ވަޒީރު ޑރ. ޢާއިޝަތު ޝިހާމް ވިިދާޅުވެއްޖެއެވެ. 

ވަޒީރު މިގޮތަށް ވިދާޅުވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ. 

މި ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ ސިވިލް ސާވިސް ކޮމިޝަނުން އެ ވުޒާރާއާ ގުޅޭގޮތުން ނެރުނު ރިޕޯޓުގައި މުވައްޒަފުންނާ މެދު ގޯސްކޮށް އަމަލުކުރި ކަމުގެ އެއްވެސް ހެއްކެއް ނުފެންނަ ކަމަށް ބަޔާންކޮށްފައިވާ ކަމަށެވެ. 

Advertisement

ވަޒީރު ވަނީ މިނިސްޓްރީގެ މުވައްޒަފުންނާ މެދު ތުހުމަތު ކުރެވޭ ގޯސް އަމަލުތަކާއި، ސިޔާސީ އަދި ފަންނީ ޕްރެޝަރުތަކާ ގުޅޭ ކަންބޮޑުވުންތަކަށް އަލިއަޅުވާލައްވާފައެވެ. އަދި ވަޒީރު ވަނީ މުޖުތަމައުގެ އެކި ފަރާތްތަކާއިއެކު މިނިސްޓްރީން މަަސައްކަތްކުރާއިރު، މިނިސްޓްރީގެ ރަނގަޅު ނަން ދަމަހައްޓަން ބޭނުންވާ ކަމަށް ވިދާޅުވެފައެވެ.

ޑރ. ޝިހާމް ވިދާޅުވީ މިނިސްޓްރީގެ މުވައްޒަފުންނާއިމެދު ގޯސްކޮށް އަމަލުކުރާ ކަމުގެ އަޑުތައް ފެތުރިގެން ދިޔައިމަ އެ ތުހުމަތުގެ ހަގީގަތް ހޯދުމަށް މިނިވަން ތަހުގީގެއް ހިންގުމަށް ސީއެސްސީގައި ވީއެންމެ އަވަހަށް އެދިވަޑައިގެންނެވި ކަމަށެވެ. މި މޭރުމުން ވާހަކަދައްކަވަމުން ވަޒީރު ވަނީ ކުރިއަށް އޮތް ތަނުގައި ވެސް، ވުޒާރާއާއި ދޭތެރޭގައި ރައްޔިތުންގެ އިތުބާރު ނެގެހެއްޓުމަށް ކުރަންޖެހޭ ކަންކަން ކުރައްވާނެކަމުގެ ޔަޤީންކަންދެއްވާފައެވެ.