ހިލޭ ޑިގްރީ ޕްރޮގްރާމަކީ އެމަނިކުފާނުގެ ވެރިކަމުގައި ކުރެވުނު އެންމެ ފަޚުރުވެރިވާ އެއް ކަންތައް ކަމަށް ކުރީގެ ރައީސް އިބްރާހިމް މުހައްމަދު ޞާލިހް ވިދާޅުވެއްޖެއެވެ. 

މިއަދަކީ އެ ޕްރޮގްރާމް ފެށުނުތާ 6 އަހަރު ފުރޭ ދުވަސް ކަމަށް ފާހަގަކުރައްވައި، ރައީސް ޞާލިހް އެކްސްގައި ކުރެއްވި ޕޯސްޓެއްގައި ވިދާޅުވީ، އެ ޕްރޮގްރާމްގެ ސަބަބުން ހިލޭ ތަޢުލީމް ހާސިލް ކުރުމުގެ ފުރުސަތު ހުޅުވިގެންދިޔަ ކަމަށެވެ. 

"މިއަދަކީ އަޅުގަނޑުމެން ހިލޭ ޑިގްރީ ޕްރޮގްރާމް ފެށިތާ 6 އަހަރު ފުރޭ ދުވަސް. މި ޕްރޮގްރާމްގެ ސަބަބުން ދަރިވަރުންނަށް ހިލޭ މަތީ ތަޢުލީމު ހާސިލުކުރުމުގެ ފުރުސަތު ހުޅުވުނު. މިއީ ރައީސެއްގެ ހައިސިއްޔަތުން އަޅުގަނޑު އެންމެ ފަޚުރުވެރިވާ އެއް ކާމިޔާބީ،" ކުރީގެ ރައީސް ޞާލިހް ވިދާޅުވިއެވެ. 

އެމަނިކުފާނުގެ ވެރިކަން ނިމުނުއިރު، 18,000 އަށްވުރެ ގިނަ ދިވެހި ޒުވާނުން މި ޕްރޮގްރާމްގެ ދަށުން ޑިގްރީ ކޯސްތަކުގައި ބައިވެރިވެފައިވާ ކަމަށާއި، 8,500 ޒުވާނުން ފުރަތަމަ ޑިގްރީ ފުރިހަމަކޮށްފައިވާ ކަމަށްވެސް ރައީސް ޞާލިހް ފާހަގަކުރެއްވިއެވެ. 

"ތަޢުލީމަކީ ހުރިހާ އެންމެން އެއް ހަމައަކަށް ގެނެސްދޭ އެއްޗެއް. އަދި ޒުވާނުންނަށް ކުރިއަށް ދިއުމަށާއި ޤައުމު ބިނާކުރުމަށް ފުރުސަތު ހުޅުވައިދޭ އެއްޗެއް. މި ޕްރޮގްރާމްގެ ކާމިޔާބީއަކީ މިކަމުގެ ހެއްކެއް،" އެމަނިކުފާނު ވިދާޅުވިއެވެ. 

ހިލޭ ޑިގްރީ ޕްރޮގްރާމަކީ ކުރީގެ ރައީސް ޞާލިހްގެ ވެރިކަމުގައި 2019 ވަނަ އަހަރު ފެށުނު ޕްރޮގްރާމެކެވެ. މި ޕްރޮގްރާމްގެ ދަށުން، ދިވެހިރާއްޖޭގެ ޤައުމީ ޔުނިވަރސިޓީއާއި، އިސްލާމީ ޔުނިވަރސިޓީއާއި، އަމިއްލަ ކޮލެޖުތަކުން ކިޔެވުމުގެ ފުރުސަތުލިބެއެވެ.

ޤައުމީ ޔުނިވަރސިޓީއާއި އިސްލާމީ ޔުނިވަރސިޓީގައި ކިޔަވާ ދަރިވަރުންނަށް މުޅި ކޯސް ހިލޭ ކޮށްފައިވާއިރު، އަމިއްލަ ކޮލެޖުތަކުން ޑީގްރީ ހަދާ ދަރިވަރުންގެ ކޯހުގެ ވަކި އިންސައްތައެއް ސަރުކާރުން ހަމަޖައްސާގޮތަށް ވަނި މި ސްކީމްގައި ހިމަނާފައި ވެއެވެ. އެގޮތުން އަމިއްލަ ކޮލެޖުތަކުން ކިޔަވާ ދަރިވަރުންނަށް ކޯސް ފީ ހިލޭކޮށްދެނީ %40 އާއި %60އާ ދެމެދުގެ އަދަދުންނެވެ.