ނިއުމޯނިއާއަކީ ފުއްޕާމޭގައި ޖެހޭ އިންފެކްޝަނެކެވެ. މިބަލި ޖެހުމުގެ ނުރައްކާ ބޮޑުވަނީ 65 އަހަރުން މަތީގެ މީހުންނަށާއި، ސިނގިރެޓް ބޯ މީހުންނަށާއި، ފުއްޕާމެއާ ގުޅުންހުރި ބަލިތައް ހުންނަ މީހުންނަށެވެ.

މި ބަލީގެ އަލާމާތް ތަކުގެ ތެރޭގައި ހިމެނެނީ؛

ހުން އައިސް ހީކެރުވުން

ކެއްސުން

ނޭވާ ކުރުވުން

މެޔަށް ތަދުވުން

ވަރުބަލިވުން

މި ޢަލާމާތްތައް ނިޔުމޯނިޔާ ޖެހޭ ކޮންމެ މީހެއްގެ ކިބައިން ނުފެނިވެސް ހިނގައިދާނެއެވެ. 

ނިޔުމޯނިޔާއަށް ފަރުވާ ކުރުމަށް އެންޓިބަޔޮޓިކްސް ބޭނުން ކުރާއިރު، ގަވާއިދުން އެންޓިބަޔޮޓިކް ކާންޖެހޭ ވަގުތުގައި އެ ކެއުމަށް ޑޮކްޓަރުން އިރުޝާދު ދެއްވައެވެ. 

އަދި މި ބަލި ޖެހުމުގެ ކުރިން ބަލިން ރައްކާތެރިވުމަށް ފިޔަވަޅުތައް އެޅުމަށްވެސް ޑޮކްޓަރުން އެދިލައްވައެވެ. އެގޮތުން ޑޮކްޓަރުން އިރުޝާދު ދެއްވާ ކަންކަމަކީ؛

• ދުންފަތުގެ އިސްތިޢުމާލު ކުރުމާއި ބަނގުރާ ބުއިން ފަދަ ކަން ކަމުން ދުރުހެލިވުން

• ގަވައިދުން ދަތް އުނގުޅުން

• އޮށޯވެ އޮވެ ނުކެއުން

• ލަސްލަހުން ރަނގަޅަށް ހަފައިގެން ކެއުން

މިކަންކަމަށް ބަލާއިރު، މީގެ ތެރެއިން ގިނަ ކަންކަމަކީ އިސްލާމްދީނުގައިވެސް އަހަރެމެންނަށް އަންގަވާފައިވާ އާދަތައް ކަން ފާހަގަކޮށްލަންޖެހެއެވެ. 

އެގޮތުން، ދުންފަތުގެ އިސްތިޢުމާލު ކުރުމާއި ބަނގުރާ ބުއިން އިސްލާމް ދީނުގައި ވަނީ ޙަރާމް ކުރައްވާފައެވެ. އަދި ކޮންމެ ދުވަހަކު މަދުވެގެން ދެފަހަރު ދަތް އުނގުޅުމަށް އިސްލާމްދީން އިރުޝާދު ދޭއިރު، ކޮންމެ ނަމާދަކަށް ދަތް އުނގުޅުމަކީ ސުންނަތުން ސާބިތުވާ ރިވެތި އާދައެކެވެ. 

މީގެ އިތުރުން، އިށީނދެ އިދެ ކެއުމާއި، ރަނގަޅަށް ހަފައިގެން، ލަސްލަހުން ކެއުމަށް އިސްލާމްދީނުގައި އަހަރެމެންނަށް ވަނީ އަންގަވާފައެވެ. އެއީ ކެއުމުގެ އަދަބުތަކުގެ ތެރޭގައި ހިމެނޭ މުހިންމު ކަންކަމެވެ.