ރ. ފައިނުގައި އެއާޕޯޓް އަޅަން އެމްޓީސީސީ އާއި މޯލްޑިވްސް އެއާޕޯޓްސް ކޮމްޕެނީ ލިމިޓެޑް އެމްއޭސީއެލްއާ ދެމެދު އެއްބަސްވުމެއްގައި މިއަދު ސޮއިކޮށްފިއެވެ.

މިއަދު ބޭއްވި ރަސްމިއްޔާތުގައި އެމްޓީސީސީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަޙްމަދު ސައުދީއެވެ. އަދި އެމްއޭސީއެލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އިބްރާހިމް ޝަރީފެވެ.

ޖަނަވަރީ މަހުގެ 23 ވަނަ ދުވަހު ފައިނަށް ވަޑައިގެން އެރަށު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، މިމަހުގެ ތެރޭގައި ފައިނުގައި އެއާޕޯޓް އެޅުމުގެ މަސައްކަތް އެމްޓީސީސީ އާ ހަވާލުކުރާނޭކަމަށް އިއުލާން ކުރައްވާފައެވެ. އަދި އެ މަޝްރޫޢުގެ އަމަލީ މަސައްކަތްތައްވެސް ވަރަށް އަވަހަށް ފެށިގެންދާނޭކަމަށެވެ.

ފައިނުގައި އެއަރޕޯޓު އެޅުމަށް ރައީސް ޑރ. މުޢިއްޒު އެންމެ ފުރަތަމަ ވަޢުދުވެވަޑައިގަތީ މިދިޔަ ރިޔާސީ އިންތިޚާބުގެ ތެރޭގައެވެ. އޭރުގެ އިދިކޮޅު ރިޔާސީ ކެންޑިޑޭޓުގެ ހައިސިއްޔަތުން 2023 ވަނަ އަހަރުގެ އޮގަސްޓު 30 ވަނަ ދުވަހު ފައިނަށް ވަޑައިގެން، އެ ރަށުގައި އެއަރޕޯޓެއް އެޅުމާއެކު، އިތުރު ގިނަ ތަރައްޤީގެ މަޝްރޫޢުތަކެއް ހިންގުމަށް ވަޢުދުވެވަޑައިގެންނެވިއެވެ.

ރ. އަތޮޅުގެ އުތުރުގައި މިހާރު ހުރީ ރ. އިފުރު އެއަރޕޯޓު އެކަންޏެވެ. އަތޮޅުގެ ދެކުނުގައި ރ. އަލިފުށީ އެއަރޕޯޓު އެޅުމުގެ މަސައްކަތްވެސް ކުރިއަށް ދެއެވެ.