އީއައިއޭ ރިޕޯޓްގެ މަސައްކަތް ނިމުނުހާ އަވަހަކަށް ދ.އަތޮޅު މާއެނބޫދޫގެ ބިން ހިއްކުމުގެ މަސައްކަތް ފެށިގެންދާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ދ.އަތޮޅަށް މިހާރު ކުރައްވަމުންގެންދަވާ  ޒިޔާރަތުގައި މިއަދު މާއެނބޫދޫއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ ބިމުގެ މައްސަލައަކީ މިރަށުގެ ރައްޔިތުންގެ އެންމެބޮޑު ކަންބޮޑުވުމެއް އޮންނަ އެއް މައްސަލަ ކަމަށެވެ.

ރައީސް ވިދާޅުވީ މާއެނބޫދޫ ރައްޔިތުން އެންމެ ބޭނުންވާ ކަންތަކަކީ މި ސަރުކާރުންވެސް އެންމެ އިސްކަންދެއްވާނޭ ކަންތައްކަމަށާއި، އެގޮތުން އީއައިއޭ ރިޕޯޓްގެ މަސައްކަތް ނިމުނުހާ އަވަހަކަށް އެރަށުގެ ބިން ހިއްކުމުގެ މަސައްކަތް ފެށިގެންދާނޭ ކަމަށެވެ.ރައީސް ވިދާޅުވީ އެމަނިކުފާނު އެންމެ އިސްކަންދޭނީ ރައްޔިތުން އެދޭގޮތަށް ރައްޔިތުންގެ އަމާޒަށް ވާސިލްވުމަށް ކަމަށެވެ. 

Advertisement

މާއެނބޫދޫ ބިންހިއްކުމުގެ މަޝްރޫޢުގެ ދަށުން ރައްޔިތުން ބޭނުންވާގޮތަށް 2 ހެކްޓަރު ވަކި ރަށެއްގެ ގޮތުގައި ހިއްކަިއދޭނޭކަމަށްވެސް ރައީސް ވިދާޅުވިއެވެ.

ބިން ހިއްކުމުެގ މަޝްރޫޢުގެ އިތުރުންވެސް ހުއްޓިފައި ނުފެށި ހުރި މަޝްރޫޢުތައް މާއެނބޫދޫގައި ހުރިކަން ފާހަގަކުރައްވަމުން ރައީސް ވިދާޅުވީ، ފެނާ ނަރުދަމާގެ މަސައްކަތްތައް ފަދަ ހުއްޓިފައިހުރި މަސައްކަތްތައް ވަރަށް އަވަހައްފެށިގެންދާނޭކަން ރައީސް ފާހަގަކުރެއްވިއެވެ. މީގެ އިތުރުން ކުޅިވަރުގެ ވަސީލަތްތަކާއި، ރިޔާސީ ކެމްޕެއިނުގައި މާއެނބޫދޫއަށް ވީ ވައުދުތައް ފުއްދުމުގެ މަސައްކަތް ވަރަށް އަވަހަށް ފައްޓަވާނޭކަމުގެ ޔަގީންކަން ރައީސް ވަނީ މިއަދު ދެއްވާފައެވެ.

މާއެނބޫދޫއަށް ކުރި ޒިޔާރަތުގައި ރައީސް މިއަދު ވަނީ އެރަށުގެ ސިއްހީމަރުކަޒަށް އަލަށް އިތުރުކުރި ބައި ހުޅުވައިދެއްވާފައެވެ.