ސަރުކާރުގެ މިހާރު އަމާޒު ހުރި ގޮތުން ރާއްޖެއަށް ބޭރުން ފައިސާ ހޯދޭނެ މަގުތައް ވެސް ބަންދުވަމުންދާނެ ކަމަށް ކުރީގެ ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

ސަރުކާރުން ގާނޫނު އަސާސީއާއި ޚިލާފަށް ކަންކަން ކުރަމުން އަންނަ ކަމަށާ، އިގްތިޞާދު ހަރުދަނާ ކުރުމަށް ފިޔަވަޅުތައް އަޅައި ދަރަނި ކުޑަކުރަން މަސައްކަތް ނުކުރާ ކަމަށް އެމްޑީޕީން ތަކުރާރުކޮށް ބުނަމުން އަންނައިރު، އަމީރު ރޭ އެކްސް ގައި ކުރެއްވި ޕޯސްޓެއްގައިވެސް ވަނީ ރާއްޖެއަށް ކުރިއެރުމެއް އޮތީ ހެޔޮވެރިކަމެއް ކޮށްގެން ކަމަށް ވިދާޅުވެފައެވެ. 

ކަންމިހެން ހުރި ނަމަވެސް، ސަރުކާރުގެ މިހާރު އަމާޒު ހުރި ގޮތުން ރާއްޖެއަށް އިންވެސްޓްކުރަން ތިބި އިންވެސްޓަރުންގެ އިތުބާރު ގެއްލި އިންވެސްޓްކުރަން ޖެހިލުންވާނެ ކަމަށް އަމީރު ވިދާޅުވިއެވެ.

އަމީރު ވިދާޅުވި ގޮތުގައި، ޕްރޮޖެކްޓްތައް ހިންގަން އަދި ދަރަނި ދައްކަން ސަރުކާރަށް ހެޔޮ އަގުގައި ފައިސާ ބޭނުންވާނެ ކަމަށާ، ނަމަވެސް ސަރުކާރުން ކަން ކުރަމުން އަންނަ ގޮތުން ރާއްޖެއަށް ބޭރުން ފައިސާ ހޯދޭނެ މަގުތައް ވެސް ބަންދުވަމުންދާނެއެވެ.

އަދި މިހާރުވެސް ރާއްޖޭގައި ފަތުރުވެރިކަން ފިޔަވައި ގިނަ އިޤްތިސާދީ ދާއިރާތައް ހުރީ އެއްކޮށް ހުއްޓިފައި ކަމަށާ، ސަރުކާރުން ކޮންޓްރެކްޓަރުންނަށް ފައިސާއެއް ނުދެވޭ ކަމަށް އަމީރު ވިދާޅުވިއެވެ.

ހަމަ އެހެންމެ، ގިނަ ކުންފުނިތައް ހުރީ ބަނގުރޫޓްވާ ހާލަތުގައި ކަމަށް ވާއިރު، އިޤްތިސާދީ ގޮތުންނާއި މާލީ ގޮތުން ކުރިޔަށް އޮތީ ދަތި އުނދަގޫ ދުވަސްތަކެއް ކަމަށް އަމީރު ލަފާކުރައްވައެވެ.

”ސަރުކާރުގެ ނާޤާބިލް ކަމުންނާއި ޚުދުމުޚްތާރު ސިޔާސަތުތަކުގެ ސަބަބުން ހުރިހާވެސް ގެއްލުމެއް އޮތީ ރައްޔިތުންނަށް.“ އަމީރު ވިދާޅުވިއެވެ.