މިނިސްޓަރު ޑރ. އަލީހައިދަރު އަހްމަދުގެ ދެ ކަނބަލުން ޖޮއިންޓް އެޕްލިކޭޝަނެއްގެ ގޮތުގައި ގެދޮރުވެރިޔާ ސްކީމަށް ހުށަހެޅި ފޯމަށް ކުރީގެ ސަރުކާރުން ޕޮއިންޓް ދިނުމަށްފަހު 15 ނޮވެންބަރު 2023 ގައި ނެރުނު ލިސްޓުގައި 75 ޕޮއިންޓް ލިބިގެން ފްލެޓްލިބޭ މީހުންގެ ލިސްޓްގައި އެފަރާތްތައް އޭރުވެސް ހިމެނިފައި އޮތް ކަމަށް މިނިސްޓަރު މުއްތަލި ވިދާޅުވެއްޖެ އެވެ.

ގެދޮރުވެރިޔާ ސްކީމުގެ ދަށުން މިދިޔަ ސަރުކާރުން ދޫކުރަން ނިންމި ފްލެޓްތައް ލިބޭ މީހުންގެ ލިސްޓް، މި ސަރުކާރުން މިއަދު ވަނީ އާއްމުކޮށްފައެވެ. ފްލެޓް ލިބޭ މީހުންގެ ލިސްޓްގައި މިނިސްޓަރު ހައިދަރުވެސް ހިމެނިވަޑައިގަންނަވައެވެ.

އެފަދަ ސްކީމަކުން މިނިސްޓަރަކަށް ފްލެޓް ލިބޭތީ އާންމުން ވަރަށް ބޮޑަށް ފާޑުކިޔުން އަމާޒުކުރަމުން ދެ އެވެ.

Advertisement

އެކަމާ ގުޅޭގޮތުން މިނިސްޓަރު މުއްތަލިބު މިރޭ ވިދާޅުވީ އޭރު އެކުލަވާލާފައިވާ އުސޫލުގެ ދަށުން މާލެއަށް އުފަން މާލޭގެ ރަޖިސްޓްރީގައިވާ ފަރާތްތަކުގެ ޝަރުޠު ހަމަވާއިރު، އޭސީސީގެ އެންގުމަށް މިސަރުކާރުން ފޯމުތައް އަލުން ވެރިފައިކުރިއިރު، ވެރިފިކޭޝަންގެ ތެރެއިން ޝަރުޠު ހަމަނުވާ ނުވަތަ ޕޮއިންޓަށް ބަދަލު އަންނަ ފަދަ ކަމެއް ފާހަގަވެފައެއް ނެތް ކަމަށެވެ.

އެހެންކަމުން ކުރީގެ ސަރުކާރުން ނެރުނު ލިސްޓުގައި ލިބިފައިވާ ޕޮއިންޓަށް ބަދަލެއް ނައިސް މިއަދު ނެރުނު ލިސްޓުގައިވެސް ހައިދަރުގެ ނަން ހިމެނިފައި ވަނީ ކަމަށެވެ.

މިކަމާ ގުޅިގެން މިނިސްޓަރު ހައިދަރު މިރޭ ނެރުއްވި ބަޔާނެއްގައި ވިދާޅުވެފައިވަނީ، ލިބިވަޑައިގެންނެވި ފްލެޓް ދޫކޮށްލުމަށް ނިންމަވާފައިވަނީ އޭނާ އާއި އަނބިކަނބަލުން މަރިޔަމް ތައުފީގަށްވުރެ ބޮޑަށް ފްލެޓްލިބުން އައުލާކަންބޮޑު މީހުން ލިސްޓްގައި ތިބިކަމަށް ދެކިވަޑައިގަންނަވާތީއެވެ. ހައިދަރު ވަނީ ހާލަތުގެ ގޮތުން ދެމަފިރިންނަށް ލިބިވަޑައިގެންނެވި ފްލެޓް ލިބިގަތުމަށް އުޒުރުވެރިވާކަންވެސް ފާހަގަކުރައްވާފައެވެ.