ބޮޑުތަކުރުފާނުމަގުގެ އެމްޓީސީސީ ފެރީޓާމިނަލުން ފެށިގެން އެމްއެމްއޭ އާ ހިސާބު މަގު ފުޅާކޮށް ތާރުއަޅައިގެން ތަރައްޤީކުރުމަށް ނިންމާފައިވާކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.

އިއްޒުއްދީން ފާލަން މަރާމާތުކޮށް ނިންމުމަށްފަހު އަލުން ހުޅުވުމަށް ބޭއްވި ރަސްމިއްޔާތުގައި ވާހަކަދައްކވަަމުން ރައީސް ޑރ.މުއިއްޒު ވިދާޅުވީ ރަމަޟާންމަސް ނިމުމާއެކު ބޮޑުތަކުރުފާނުމަގު އެ ސަރަހައްދު ތަރައްޤީކުރަން ފައްޓަވާނޭކަމަށެވެ. ރައީސް ވިދާޅުވީ އެ ސަރަހައްދު ތަރައްޤީކުރުމަށްފަހު މިއަހަރު ނިމެންވާއިރަށް ބޭނުންކުރަން ފަށާނޭކަމަށާއި، މިހާރު އެ މަޝްރޫޢު ކުރިއަށްގެންދިއުމަށް ފީޒިބިލިޓީ ހަދައި، ދެންވެސް ކުރަންޖެހޭ ކަންކަން ކުރައްވަމުން އަންނަކަމަށެވެ. 

ރައީސް ވިދާޅުވީ އެ މަޝްރޫޢުއަކީ ހަމަ ޔަގީނުންވެސް ހިނގާނެ މަޝްރޫޢުއެއް ކަމަށާއި، އެ މަޝްރޫޢުއައް ބޭނުންވާ ފައިނޭންސްވެސް ހަމަޖެހިފައިވާކަމަށެވެ. މިހާރުދެން ކުރަން އޮތީ އެ މަޝްރޫޢުގެ އަމަލީ މަސައްކަތްތައް ފެށުމަށް ބޭނުންވާ ކަންކަންކަމަށް ރައީސް ފާހަގަކުރެއްވިއެވެ. ރައީސ ްވިދާޅުވީ ބޮޑުތަކުރުފާނުމަގުގެ އެ ސަރަހައްދު ބޮޑުކުރުމުގެ ގޮތުން ޝީޓްޕައިލްކޮށް ހިއްކާނޭ ކަމަށެވެ. 

Advertisement

އެމްޓީސީސީ ފެރީޓާމިނަލުން ފެށިގެން އެމްއެމްއޭ އާ ހިސާބު މަގު ފުޅާކޮށް ތާރުއަޅައިގެން ތަރައްޤީކުރުމަށް ނިންމަވާފައިވާކަން ރައީސް ވިދާޅުވިއިރު، ކުރީގެ ސަރުކާރުންވެސް ވަނީ އެ ސަރަހައްދު ތަރައްޤީކުރުމަށް މަސައްކަތްކޮށްފައެވެ. ނަމަވެސް އެ މަސައްކަތް ކުރުމުގެ އަމަލީ މަސައްކަތާ ހިސާބަށް ގޮސްފައެއް ނުވެއެވެ. ރައީސް ވިދާޅުވީ ބޮޑުތަކުރުފާނުމަގުގެ އެ ސަރަހައްދުގެ އިތުރުން، މާލެ އާއި ވިލިމާލޭގެ މަގުތައްވެސް ތަރައްޤީކުރުމުގެ މަސައްކަތް ޗައިނާ ސަރުކާރުގެ އެހީގެ ދަށުން ފައްޓަވާނޭކަމަށެވެ.