ރަމަޟާންމަހާ ގުޅިގެން ހަދިޔާގެ ގޮތުގައި ސަރުކާރުން ކޮންމެ ގޭބިސީއަކަށް ދިނުމަށް ނިންމި މަސްދަޅުކޭސް ބަހާ ގަޑިތަކަށް ބަދަލުގެނެސްފިއެވެ.

މިކަމާ ގުޅޭގޮތުން އެސްޓީއޯއިން ބުނީ މާދަމާ މަސްދަޅު ދޫކުރުން ކުރިއަށްގެންދާނީ، 21:30 ފެށިގެން 23:30 ހަށް ކަމަށެވެ. ޖެހިގެން އަންނަ ދުވަހަކީ ރަމަޟާންމަހުގެ ފުރަތަމަ ދުވަސްކަމަށްވާތީވެ، އެދުވަހު މަސްދަޅުބެހުން ނޯންނާނެއެވެ. 

ރަމަޟާންމަހުގެ ފުރަތަމަ ދުވަހަށް މަސްދަޅުބެހުން މެދުކަނޑާލިނަމަވެސް، މާޗްމަހުގެ ދެވަނަ ދުވަހުން ފެށިގެން 10 ވަނަ ދުވަހުގެ ނިޔަލަށް ކޮންމެ ރެއެއްގެ 21:30 ހުން ފެށިގެން 23:30 ހަށް މަސްދަޅު ބެހުމުގެ ކަންކަން ކުރިއަށްދާނެއެވެ.

ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވުޒާރާއިން އެންމެފަހުން ބުނެފައިވަނީ މާލޭގެ 15،000 ހާހަށްވުރެ ގިނަ ގޭބިސީއަށް މަސްދަޅުކޭސް ބަހާފައިވާކަމަށެވެ. ރޯދަމަހާ ގުޅިގެން ހަދިޔާގެ ގޮތުގައި ދިނުމަށް ނިންމި މަސްދަޅުކޭސް، ޓޯކަން މެދުވެރިކޮށް ނެގޭނޭ އިންތިޒާމު ވަނީ ހަމަޖައްސާފައެވެ. ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވުޒާރާއިން ވަނީ މިކަމަށް ހާއްސަ ޕޯޓަލެއް ހަމަޖައްސާފައެވެ. އެ އިދާރާއިން ބުނީ https://roadhahadhiya.mv ޕޯޓަލް މެދުވެރިކޮށް ކިއު ނަމްބަރު ނެގޭނޭކަމަށެވެ.  

- މިފްކޯ ކޮމްޕްލެކްސް (މާފަންނު): 200 ޓޯކަން

- އެމް.ޓީ.ސީ.ސީ ސޯމިލް: 200 ޓޯކަން

- ހެންވޭރު ދަނޑު: 100 ޓޯކަން

- ގަލޮޅު ދަނޑު – ސެޓަޕް 1 : 50 ޓޯކަން

- ގަލޮޅު ދަނޑު – ސެޓަޕް 2 : 50 ޓޯކަން

- ގަލޮޅު ދަނޑު – ސެޓަޕް 3 : 50 ޓޯކަން

- ގަލޮޅު ދަނޑު – ސެޓަޕް 4 : 50 ޓޯކަން

- ސޯޝަލް ސެންޓަރު : 100 ޓޯކަން

- ވިލިމާލެ – ވެމްކޯ ސައިޓް: 100 ޓޯކަން

- ހުޅުމާލެ – އުމަރު ޒާހިރު ބިލްޑިންގ: 100 ޓޯކަން

- ހުޅުމާލެ – ޕޮލްކޯ ޓަވރ (ސީ ބްލޮކް): 100 ޓޯކަން

- ހުޅުމާލެ – ހިޔާ ޓަވަރު 10 : 100 ޓޯކަން

- ހުޅުމާލެ – ކާމިލްދީދި ޕްރީސްކޫލް: 100 ޓޯކަން  

މަސްދަޅުކޭސް ބަލާ އަންނައިރު އެ އަންނަ ފަރާތެއްގެ އައިޑީކާޑާއި ވޭތުވެދިޔަ ތިން މަސްދުވަހުގެ ކަރަންޓްބިލް ގެންނަންޖެހެއެވެ.