‏މިއަދު އިއުލާންކުރި ފްލެޓް ލިސްޓް ނެރުމުގައި ޒަރެއްގެ މިންވަރު ވެސް އެއްވެސް ނުފޫޒެއް ފޯރުވާފައި ނުވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ދެއްވައިފި އެވެ.

"ގެދޮރުވެރިޔާ" ސްކީމްގެ ދަށުން ދޫކުރަން ނިންމާފައިވާ 4000 ފްލެޓް ލިބޭ ފަރާތްތަކުގެ ލިސްޓް މިއަދު ވަނީ އާންމު ކޮށްފަ އެވެ.

ފްލެޓު ދޭން ކަނޑައަޅާފައިވާ 4000 މީހުންގެ ލިސްޓް ބެލުމުން ޝަރުތު ހަމަވީ 1،820 މީހުން ކަމަށް ކަނޑައަޅާ އެ މީހުންގެ ނަންތައް މިހާރު ވަނީ ޔަގީންވެފަ އެވެ. އެ ލިސްޓުން ކުރީން އެތައް ބަޔަކު އުނިވެފައިވުމުން އެތައް ވާހަކަތަކެއް ދަނީ ދެކެވެމުންނެވެ.

Advertisement

އިއްޒުއްދީން ފާލަން ހުޅުވަން މިރޭ ބޭއްވި ޖަލްސާގައި ރައީސް ވިދާޅުވީ ލިސްޓް ނެރުމުގައި އެމަނިކުފާނާއި ސަރުކާރުގެ އެއްވެސް ނުފޫޒެއް ނެތް ކަމަށެވެ.

‏"މި ސަރުކާރަކީ ދިވެހި ހުރިހާ ރައްޔިތުންނަށް، އެ ރައްޔިތެއްގެ ޙައްޤުތައް، އަދި އޭގެ އިތުރަށްވެސް ކަންކަން ފުރިހަމަކޮށްދިނުމުގައި އިންތިހާއަށް ޝައުޤުވެރިކަންހުރި، ލޯތްބާއި ކުލުނާއެކު، ހަމަހަމަ ކަމާއި އިންސާފުވެރިކަމާއި ޢަދުލުވެރިކަމާއެކު ރައްޔިތުންނަށް ޚިދުމަތް ކުރަން އައިސްފައިވާ ސަރުކާރެއް." ރައީސުލްޖުމްހޫރިއްޔާ ވިދާޅުވި އެވެ.

އެމަނިކުފާނުގެ އަމާޒުފުޅަކީ، މި ދައުރު ނިމޭއިރު ގެދޮރުވެރިކަން އެއްގޮތަކަށްވެސް ނުލިބޭ ރައްޔިތަކު ނުބެހެއްޓުން ކަމުގައި ވެސް ރައީސުލްޖުމްހޫރިއްޔާ މިރޭ ވިދާޅުވި އެވެ. އަދި ފަސްޓް ހައުސް، ނުވަތަ އެންމެ ފުރަތަމަ ގެ އެމީހާގެ ބޯހިޔާވަހިކަމަށް މަގުފަހިކޮށްދެވިފައި ނެތް ރައްޔިތަކު ނުހުންނަ ހިސާބަށް ކަންކަން ތަރުތީބު ކުރެއްވުމުގެ ކަންކަން ކުރިއަށް ގެންދަވާ ކަމުގައި އެމަނިކުފާނު ވިދާޅުވި އެވެ.. މިގޮތުން ސަރުކާރުން ކުރިއަށް ގެންދަވާ ބޯހިޔާވަހި ކަމުގެ އެކި މަސައްކަތްތަކުގެ މައްޗަށް އެމަނިކުފާނުގެ ވާހަކަފުޅުގައި ތަފްސީލީ ގޮތެއްގައި ބައްލަވައިލެއްވި އެވެ.