ފެން ކުންފުނި -- އެމްޑަބްލިއުއެސްސީ އިން އޭޕްރީލް މަހު ފޮނުވާ ބިލްތަކަށް ރޯދަ މަހުގެ ޑިސްކައުންޓް ލިބޭނެ ކަމަށް އެ ކުންފުނިން ބުނެފި އެވެ.

އެ ކުންފުނިން ބުނީ މި ރޯދަ މަހު, ގޭބީސީތަކުގެ ފެންބިލާއި ކަރަންޓް ބިލަށް ޑިސްކައުންޓް ދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވުމާއި ގުޅިގެން އޭޕްރީޫލް މަހު ފެން ކުންފުނިން ޑޮމެސްޓިކް ކަސްޓަމަރުންނަށް ފޮނުވާ ބިލްތައް އާންމު މަހަކަށް ވުރެ ބޮޑު ނުވާނެ ގޮތަށް އުސޫލެއްގެ ތެރެއިން ޑިސްކައުންޓް ދިނުމަށް ހަމަޖެހިފައިވާ ކަމަށެވެ.

އެގޮތުން އާންމު މަހެއްގައި ފެނާއި ކަރަންޓް ބިލްގެ މިންވަރު ކަމުގައި ބަލާނީ 2024 ވަނަ އަހަރުގެ ފެބްރުއަރީ, މާޗް އަދި އޭޕްރީލް މަސް ނުހިމަނާ އެ އަހަރުގެ ބާކީ އޮންނަ މަސް މަހުގެ އެވްރެޖް މިންވަރަށް ކަމަށާ މި ގޮތަށް ކަނޑައެޅޭ އާންމު މަހުގެ ބިލުގެ މިންވަރަށް ވުރެ އޭޕްރީލް މަހު ތައްޔާރު ކުރެވޭ ބިލް ބޮޑުވާނަމަ އެ ބޮޑުވާ މިންވަރު ޑިސްކައުންޓްގެ ގޮތުގައި އޭޕްރީލް މަހު ފޮނުވާ ބިލުން އުނިކޮށްދޭނެ ކަމަށެވެ.

Advertisement

މި ގޮތުން އުނިކޮށްދޭ މިންވަރަކީ އޭޕްރީލް މަހު ފޮނުވާ ބިލްގެ 10 އިންސައްތައަށް ވުރެ ކުޑަމިންވަރެއް ކަމުގައިވާނަމަ އެ މިންވަރަށް ޑިސްކައުންޓް މަތިކޮށްދޭނެ އެވެ. އަދި އޭޕްރީލް މަހުގައި އަލަށް ބިލުކުރެވޭ މީޓަރުތަކާއި ކުރިން ރެޖިސްޓްރީކޮށްފައިވީނަމަވެސް މިހާތަނަށް ބިލުކުރެވިފައި ނުވާ ކަސްޓަމަރުންނަށް ފޮނުވާ ފުރަތަމަ ބިލަކީ މި އަހަރުގެ އޭޕްރީލް މަހު ފޮނުވާ ބިލް ކަމުގައިވާނަމަ އެފަދަ ފަރާތްތަކަށް ވެސް އޭޕްރީލް މަހު ފޮނުވާ ބިލުން ޑިސްކައުންޓް ދޭނެ އެވެ.

ފެން ކުންފުނިން ބުނީ އެކަމާ ގުޅޭ އެއްވެސް މައުލޫމާތެއް ސާފުކުރަން ބޭނުންނަމަ ކަސްޓަމާ ކެއާ ސެންޓަރުގެ ހޮޓްލައިން 105 އަށް ގުޅުމުން މައުލޫމާތު ސާފުކޮށް ދޭނެ ކަމަށެވެ. އަދި 1050 އަށް އެސްއެމްއެސް ކޮށްގެން ވެސް މައުލޫމާތު ސާފު ކުރެވޭނެ އެވެ.