މަރާމާތަށް ރަސްފަންނު ބަންދުކުރުމަށްފަހު، މިވަގުތު އެތަނަށް ގެންނަންޖެހޭ ބަދަލުތައް ގެނެސް ރަސްފަންނު އާންމުންނަށް  ހުޅުވާލައިފިއެވެ.

އާންމުނަށް ރަސްފަންނު ހުޅުވާލިއިރު، ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު ވަނީ އެސަރަހައްދަށް ވަޑައިގެން މަސައްކަތްތައް ކޮށްފައިހުރިގޮތް ބައްލަވާލައްވާފައެވެ. މަރާމާތުގެ މަަސައްކަތްތައް ކުރުމަށް ރަސްފަންނު ބަންދުކޮށްފައިވަނީ ހުސްވި ފެބުރުއަރީމަހުގެ ފަހުކޮޅެވެ. 

ރައީސް ޑރ.މުހައްމަދު މުއިއްޒު ވިދާޅުވެފައިވަނީ، ކުރިން އެތަން އޮތް ވަރަށްވުރެ ފުރިހަމަޔަށް ތަރައްޤީކޮށްދެއްވާނޭކަމަށެވެ. ރަސްފަންނު ތަރައްޤީކުރުމުގެ މަސައްކަތް ކަމާބެހޭ ފަރާތްތަކުން ފަށާފައިވާއިރު، މިވަގުތައް ރަސްފަންނު އާންމުނަށް ބޭނުންކުރެވޭ ގޮތަށް ހުޅުވާލާފައިމިވަނީ ރަމަޟާންމަހު ރައްޔިތުންނަށް ފަސޭހަޔަކަށެވެ.

Advertisement

ރައީސް ޑރ.މުއިއްޒު ރަސްފަންނު ބައްލަވާލައްވަނީ..

އާންމުނަށް ރަސްފަންނު ބޭނުންކުރެވޭގޮތަށް މިއަދު ހުޅުވާލިއިރު، ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާއިން މިއަދު ވަނީ އެ ސަރަހައްދު ސާފްކުރުމުގެ މަސައްކަތް ފަށާފައެވެ. 

ރަސްފަންނު ސާފުކުރުމުގެ މަސައްކަތްތައް ފަށާފައިވާއިރު، މާލެސިޓީ ކައުންސިލުން ވަނީ ރަސްފަންނު މޫދަށް އެރިއުޅޭ ސަރަހައްދުން ކިސަޑް ނެގުމުގެ މަސައްކަތްވެސް ކުރިއަށް ގެންގޮސްފައެވެ.

ރަސްފަންނަކީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި 2016 ވަނަ އަހަރު ތަރައްޤީކުރި ތަނެކެވެ. ބޭނުމަކީ މާލޭގައި ދިރިއުޅެމުންދާ ރައްޔިތުން ހިތްއުފާކޮށްލާނޭ ސަރަހައްދެއް ހޯދައިދިނުމެވެ. ރަސްފަންނު ތަރައްޤީކުރިތާ 8 އަހަރު ވެގެންދިޔައިރު، އެތަން ވަނީ ވަރަށްބޮޑަށް ވީރާނާވެފައެވެ.