ވިލިމާލޭގައި ހުރި ގަސްތަކެއް މާލެ ސިޓީ ކައުންސިލުން ކެނޑި މައްސަލާގައި އެ ކައުންސިލާ ދެކޮޅަށް ޖިނާއީ ދައުވާ ކުރަން ޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ވިލިމާލޭގެ މަގެއްގައި ހުރި ގިނަ އަދަދެއްގެ ގަސްތަކެއް ކައުންސިލުން ވަނީ ކަނޑާފަ އެވެ. އެ މަންޒަރު ފެންނަ ވީޑިއޯއެއް ހިއްސާކޮށް އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ މާލެ ސިޓީގެ މަގުތަކުގައި ހުރިގަސްތައް މާލެ ސިޓީ ކައުންސިލުން އެއިރަކު ހިތަށްއެރި ގޮތަކަށް ކަނޑާ ހެދުމަކީ ގާނޫނާއި ހިލާފު ކަމެއް ކަމަަށެވެ.
މިކަމުގައި އެ ކައުންސިލްގެ މައްޗަށް ޖިނާއީ ދައުވާ އުފުލަން ޖެހޭ ކަމަށް އެމަނިކުފާނު ދެކެވަޑައިގަންނަވާ ކަމަށް ވެސް ވިދާޅުވި އެވެ.
ވޮއިސްއަށް އެނގިފައިވާ ގޮތުގައި ކައުންސިލުން އެ ގަސްތައް ކެނޑީ ބަސް ދަތުރުތަކަށް ދަތިވާތީ ގަސްތަކުގެ އޮފިތައް ކަނޑައިދޭން އެމްޓީސީސީން އެދުމުންނެވެ.
ގަސްތައް ކެނޑި މައްސަލަ ބޮޑުވުމުން ކައުންސިލުން ވެސް މިހާރު ދަނީ އެކަން ބަލަމުން ކަމަށް އެނގިފައިވެ އެވެ.
އަމީނީމަގު ތަރައްގީ ކުރަން އެ މަގުގައި ހުރި ބޮޑެތި ގަސްތައް ކެނޑުމުން ވެސް ނަޝީދު ވަނީ ނުރުހުން ފާޅުކޮށް އެއީ ގާނޫނާ ހިލާފު ކަމެއް ކަމަށް ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
