އެސްޓީއޯއިން އަނެއްކާވެސް ކާށި ޝިޕްމަންޓެއް ގެނެސް ކާށި ވިއްކަން ފަށައިފިއެވެ.
އެސްޓީއޯއިން އަނެއްކާވެސް ކާށި ޝިޕްމަންޓެއް ގެނެސް ވިއްކަން ފަށާފައިވަނީ ބާޒާރުގައި ކާށީގެ އަގު ބޮޑުވަމުންދާތީއެވެ. އެސްޓީއޯއިން މިފަހަރު ގެނައި ކާށި ވިއްކަމުންދަނީ ކިލޯއެއް 20 ރުފިޔާއަށެވެ. އެގޮތުން އެސްޓީއޯ ޕީޕަލް ޗޮއިސް ސުޕަމާޓުން ކާށި ކިލޯއެއް 20 ރުފިޔާއަށް ލިބޭނޭކަމަށް އެކުންފުނިން ބުނެއެވެ. އެސްޓީއޯއިން ވަނީ މިދިޔަ ހަފްތާގައިވެސް ކާށި ޝިޕްމަންޓެއް އެތެރެކޮށް ކިލޯއެއް 20 ރުފިޔާއަށް ވިއްކާފައެވެ.
މީގެ އިތުރުން ރޯދަމަސް ފެށުނުއިރު ބާޒާރުގައި ކާށީގެ އަގު އުފުލުމާއެކު އެސްޓީއޯއިން ވަނީ ކާށީގެ ޝިޕްމަންޓެއް ގެނެސް ވިއްކާފައެވެ. އެފަހަރު ކާށި ވިއްކާފައިވަނީ، ކާއްޓެއް 5 ރުފިޔާގެ މަގުންނެވެ. އޭރު ބާޒާރުގައި ކާށީގެ އަގުހުރީ 10 ރުފިޔާއިން މަތީގައެވެ. ރާއްޖޭގެ ބާޒާރުގައި ކާށީގެ އަގު މައްޗަށްދިއުމާ ގުޅިގެން މީގެ ކުރިންވެސް އެހެން ޤައުމުތަކުން ކާށި ގެނެސް ވިއްކާފައި އެބަހުއްޓެވެ. މިގޮތުން މީގެ ކުރިން އިންޑިއާ، ލަންކާ އަދި އިންޑޮނޭޝިއާއިންވެސް ކާށި ގެނެސްފައި އެބަހުއްޓެވެ. ނަމަވެސް އެންމެ ގިނައިން ކާށި ގެންނަނީ އިންޑިއާއިންނެވެ.
އެސްޓީއޯއިން ދަނީ ރައްޔިތުން އެންމެ އާންމުކޮށް ބޭނުންކުރާ ބާވަތްތަކުގެ ތެރެއިން، ބާޒާރުގައި އަގުބޮޑުވާ ކާބޯތަކެތީގެ ބާވަތްތައް ރާއްޖެ އެތެރެކޮށް ހެޔޮއަގުގައި ވިއްކަމުންނެވެ.
Advertisement
This content is created and paid for by advertisers and does not involve Voice Journalists
