ކަނޑުމަގުން ރާއްޖެ އެތެރެކުރަން އުޅުނު ވޭޕްތަކެއް މޯލްޑިވްސް ކަސްޓަމްސް ސާވިސްއިން އަތުލައިގަނެފިއެވެ.

ކަސްޓަމްސްއިްނ ބުނީ، ކަނޑުމަގުން ރާއްޖެއަށް އެތެރެކުރަން އުޅުނު 400 ވޭޕް އެ އިދާރާއިން އަތުލައިގަނެފައިވާކަމަށެވެ. އެތަކެތި އަތުލައިގަނެފައިވަނީ، މާލެ ވިޔަފާރި ބަނދަރަށް ގެނެސްފައިވާ ސީފްރައިޓް ޝިޕްމަންޓެއް ބަލައިފާސްކުރުމުގެ ތެރޭގައި ޝައްކުކުރެވޭ ޒާތުގެ ބާވަތްތަކެއް ހުރުމުން، އިތުރަށް ބަލާ ފާސްކުރުމުގެ ތެރެއިންނެވެ.

އެގޮތުން އާއްމުކާގޯ ގެ ގޮތުގައި ކަސްޓަމްސްއަށް ޑިކްލެއަރކޮށްފައިވާ މި ޝިޕްމަންޓުގައި ހިމެނޭ މުދަލުގެ ތެރޭގައި ވޭޕް ސްޓިކް ފޮރުވާފައި ހުރިކަމަށް ކަސްޓަމްސްއަށް ޝައްކުކުރެވިގެން، އިތުރަށް ބެލިބެލުމުން 400 ވޭޕް ހިމެނޭ ޕެކޭޖެއް އަތުލައިގަނެވިފައިވާކަމަށް ކަސްޓަމްސްއިން ބުންޏެވެ. ކަސްޓަމްސްއިން ދަނީ މި މައްސަލަ އިތުރަށް ތަހުގީގުކުރަމުންނެވެ.

ދުންފަތް ކޮންޓްރޯލްކުރުމާ ބެހޭ ޤާނޫނުގެ ދަށުން އިލެކްޓްރޯނިކް ސިނގިރެޓާއި ވޭޕްކުރުމަށް ބޭނުންކުރާ އާލާތްތަކަކީ، ދިވެހިރާއްޖެއަށް އެތެރެކުރުން މަނާ ތަކެއްޗެވެ. ދުންފަތް ކޮންޓްރޯލްކުރުމާ ގުޅޭ އާއްމު ޤަވާއިދުގައި ބުނެފައިވަނީ، ރާއްޖެއަށް އެތެރެކުރުން މަނާ އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުމެއް ބޭނުންކުރުން މަނާތަނެއްގައި ބޭނުންކުރަނިކޮށް ފެނިއްޖެނަމަ، ޤާނޫނު ތަންފީޒުކުރާ އިދާރާއަކަށް ޤާނޫނަކުން ލިބިދޭ ބާރެއްގެ ދަށުން ނުވަތަ ކޯޓު އަމުރެއްގެ ދަށުން ބަލާ ފާސްކުރުމުގެތެރޭގައި އެފަދަ އެއްޗެއް ފެނިއްޖެނަމަ އެ އެއްޗެއް ތަންފީޒީ އިދާރާގެ ބެލުމުގެ ދަށަށް ނެގިދާނޭ ކަމަށެވެ.

އެގޮތުން އިލެކްޓްރޯނިކް ސިނގިރޭޓާއި، ވޭޕް ފަދަ މަނާކޮށްފައިވާ އެއްޗެއް ގެންގުޅެނިކޮށް ފެނިއްޖެނަމަ 2،000 ރުފިޔާއިން ޖޫރިމަނާކުރުމުގެ ބާރު ފުލުހުންނަށް މިހާރު އޮވެއެވެ. އަދި އެފަދަ ފަރާތަކަށް އަންގާ އެންގުމަކާ އެއްގޮތަށް އަމަލުނުކޮށްފިނަމަ 50،000 ރުފިޔާއިން ޖޫރިމަނާކުރުމުގެ ބާރުވެސް ވަނީ ދީފައެވެ. އަދި އެއީ ވިޔަފާރިކުރާ ތަނެއްނަމަ 100،000 ރުފިޔާއިން ޖޫރިމަނާކޮށް، ވިޔަފާރީގެ ހުއްދަ ބާތިލްކުރަން ހުށަހަޅަން ޖެހޭނޭކަމަށްވެސް ވަނީ ބަޔާންކޮށްފައެވެ.