ކޮންމެ އަހަރެއްގެ ރަމަޟާން މަހުވެސް ޕީ.އެސް.އެމް ނިއުސްއިން އަންނަނީ ތަފާތު އެކިއެކި ކޮންޓެންޓުތަކާއި ޕްރޮގްރާމްތައް ބެލުންތެރިންނާ ހަމައަށް ގެނެސްދިނުމަށް މަސައްކަތް ކުރަމުންނެވެ. އެގޮތުން މި ރަމަޟާންމަހަށް ޚާއްސަކޮށްގެން ޕީ.އެސް.އެމް ނިއުސްއިން މުޅިން އަލަށް ގެނެސްދޭ " ސިފަނުވި ދުލަކުން " މި ޕްރޮގްރާމްގެ ފުރަތަމަ އެޕިސޯޑްގެ ޕްރޮމޯ މިހާރުވަނީ ބެލުންތެރިންނާ ހިސާބަށް ދޫކޮށްލާފައެވެ.

ޕްރޮމޯއިން ފެންނަނީ ލޯފަން މީހެކެވެ. ދެމަފިރިއަކު ދިރިއުޅުން އާރާސްތުކުރަން ކުރަމުންދާ މަސައްކަތެވެ. އެވާހަކަތައް އަސަރާއެކު އެބުނެދެނީ ސިފަނުވި ދުލަކުންނެވެ.  "ސިފަނުވި ދުލަކުން" މި ޕްރޮގްރާމްއަކީ ލޯފަން ފަރާތްތަކަށް ހާއްސަކޮށްގެން ގެނެސްދޭ ޕްރޮގްރާމްއެކެވެ.

މި ސިލްސިލާގެ ފުރަތަމަ އެޕިސޯޑް ހޮނިހިރު ދުވަހުގެރޭ 22:00 ގައި ޕީ.އެސް.އެމް ނިއުސްއިން ގެނެސްދިނުމަށް ވަނީ ހަމަޖެހިފައެވެ. މި އެޕިސޯޑް ހާއްސަކޮށްފައި ވަނީ ހދ. ކުމުންދޫއަށް އުފަން އުމުރުން 50 އަހަރުގެ އަޙްމަދު ސާލިޙް އާއި އަންހެނުން ފާއިޒާގެ ދިރިއުޅުމުގެ ވާހަކަތަކުގެ މައްޗަށެވެ.

ވޮއިސްއަށް ދިން ހާއްސަ އިންޓަރވިއުއެއްގައި ޕްރޮގްރާމްގެ ޕްރޮޑިއުސަރ އަޙްމަދު ޝާފިޢު ބުނީ ، "ދިރިއުޅުމުގައި ލޯފަންވިކަމުގައި ވީނަމަވެސް މުޖުތަމައުގައި ބާކީނުވެ، އެފަދަ މީހުންނަށްވެސް އަބުރުވެރި ދިރިއުޅުމެއް އުޅެވިދާނެކަން އަންގައިދިނުމަކީ މި ސިލްސިލާގެ މައިގަނޑު މަގުސަދުކަމަށެވެ. އަދި ކޮންމެ އެޕިސޮޑަކުންވެސް އެފަރާތްތައް މެދުވެރިކޮށް ބެލުންތެރިންނާއި އަޑުއެހުންތެރިންނަށްވެސް ތަފާތު ވަރުގަދަ މެސެޖްތަކެއް ލިބިގެންދާނެކަމަށްވެސް ޕްރޮޑިއުސަރ ފާހަގަކުރިއެވެ. ޕްރޮޑިއުސަރ އަޙްމަދު ޝާފިޢު ބުނީ މި ސިލްސިލާގެ ފުރަތަމަ އެޕިސޯޑް އިން ފެންނާނީ ލާމަސީލު ދެމަފިރިން ކަމަށެވެ. އެއީ ހިތާ ހިތުގެ ގުޅުމެއް ކަމަށެވެ.

" ސިފަނުވި ދުލަކުން"ގެ ޖުމްލާ 4 އެޕިސޯޑްއެއް މި ރަމަޟާންމަހު ގެނެސްދިނުމަށް ވަނީ ހަމަޖެހިފައެވެ. މި ޕްރޮގްރާމް ގެނެސްދޭނީ ކޮންމެ ހޮނިހިރު ދުވަހެއްގެ ރޭ 22:00ގައި ޕީ.އެސްއެމް ނިއުސް އިންނެވެ.