އަދުގެ ސަރުކާރުން ފްލެޓް ލިސްޓް މުރާޖައާކޮށް ނިންމައި ފްލެޓްލިސްޓް ނެރުނުއިރު، ސަރުކާރުން ބޭނުންވާ ބަޔަކަށް ފްލެޓްތައް ދީފައިވާކަމަށް އިދިކޮޅު އެމްޑީޕީން ތުހުމަތުކޮށްފިއެވެ.

ގެދޮރުވެރިޔާ ސްކީމުގެ ދަށުން އެމްޑީޕީ ސަރުކާރުގެ ދުވަސްވަރު ވަނީ 4،000 ފްލެޓަށް ކުރިމަތިލިފަރާތްތަކުގެ ފްލެޓް ލިބޭ ލިސްޓް ނެރެފައެވެ. ނަމަވެސް ފްލެޓްތައް ދިނުމުގައި އުސޫލާ ހިލާފަށް ކަންކަން ކޮށްފައިވާކަމަށްބުނެ އޭސީސީން ފާހަގަކުރި މައްސަލަތަކާއެކު އަދުގެ ސަރުކާރުން ވަނީ ފްލެޓް ލިސްޓް އަލުން މުރާޖައާކޮށް ލިސްޓް ނެރެފައެވެ.

މިކަމާ ގުޅިގެން އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެމްޑީޕީ ސަރުކާރުގެ ފްލެޓް ކޮމިޓީގައި އެންމެ އިސްކޮށް ހުންނެވި އަކްރަމް ކަމާލުއްދީން ވިދާޅުވީ، މި ސަރުކާރުން ވަނީ އެމީހުން ބޭނުންވާ ބަޔަކަށް ފްލެޓްތައް ދީފައި ކަމަށެވެ. މީގެ އެއް ހެއްކަކީ ކުރީގެ ހައުސިން މިނިސްޓަރު އަލީ ހައިދަރަށް ފްލެޓް ލިބުންކަމަށް އަކްރަމް ފާހަގަކުރެއްވިއެވެ. އަކްރަމް ވިދާޅުވީ އެމްޑީޕީ ސަރުކާރުން އެކުލަވާލި ލިސްޓަށް ބަލާއިރު، ހައިދަރަށް ފްލެޓް ލިބޭވަރަށް މާކްސް ލިބިވަޑައިގެންނެވިނަމަވެސް ގުރުއަތުލުން ނިމުނުއިރު، އެނަމެއް ލިސްޓަކު ނޯންނާނޭކަމަށެވެ.

Advertisement

ފްލެޓް ލިސްޓާ ގުޅޭގޮތުން ވާހަކަދައްކަވަމުން އަކްރަމް ކަމާލުއްދީން ވިދާޅުވީ، ފްލެޓް ލިސްޓްގެ ސައްހަކަން ގެއްލި ސަރުކާރުން ފްލެޓްލިސްޓާ ކުޅެފައިވާކަމަށެވެ. އެގޮތުން މިއީ ބައެއްގެ ހައްޤުތަކަށް އަރައިގަތުންކަން އަކްރަމް ފާހަގަކުރެއްވިއެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޑީޕީގެ ޤާނޫނީ ޓީމްގައި ހިމެނިވަޑައިގަންނަވާ އަހުމަދު މައުރޫފް ވިދާޅުވީ، އެމްޑީޕީން ނެރުނު ފްލެޓް ލިސްޓްގެ ސައްހަކަން ނެތްކަމަށް ސަރުކާރުން ފާހަގަކުރާ ކަންކަމުގައި އެއްވެސް ކަހަލަ ބުރަދަނެއް ނެތްކަމަށެވެ. މިގޮތުން އައިދީކާޑުގެ އެއްފުށް އަޕްލޯޑް ކުރިކަމަށް މިނިސްޓަރު މުއްތަލިބް ވިދާޅުވާއިރު، އެންމެ ފުރަތަމަ ފްލެޓަށް ފޯމް ފުރުމަށް ވަދެވެނީވެސް ޤާނޫނީ ހައިސިއްޔަތު އޮންނަ އީފާސް މެދުވެރިކޮށްކަމަށް މައުރޫފް ފާހަގަކުރެއްވިއެވެ. 

ކައުންސިލްގެ ލިޔުން ހުށަހަޅައިގެން ފްލެޓް ލިބުނުކަމަށް ވާހަކަދައްކާއިރު، އެ ލިޔުމުގެ ސައްހަކަން ކަށަވަރުކުރުމަށްފަހު ބައެއް ފަރާތްތައް ޑިސްކޮލިފައިކޮށްފައިވާނޭކަމަށާއި، ކައުންސިލުންދިން ލިޔުންތައް ވެރިފައިކުރުމަށް އުސޫލްތަކެއް ހަދާފައިހުރި ކަމަށެވެ. އޭނާ ވިދާޅުވީ ފްލެޓް ލިސްޓް އެކުލަވާލުމުގެ ކަންކަން ކުރިއަށްގެންގޮސްފައި ހުންނާނީ ރައްޔިތުންނަށް އެންމެ މަންފާހުރި ގޮތަށްކަމަށާއި، އެގޮތުން މީހެއްގެ އަނބިދަރިން މާލޭގައި އުޅެފައި އެމީހާ މާލެއިން ބޭރުގައި މަސައްކަތްކުރިނަމަވެސް އެމީހުންނަށް ފްލެޓް ދީފައި ހުންނާނީ އުސޫލްގެ ތެރެއިންކަން މައުރޫފް ވިދާޅުވިއެވެ.

ނޫސްވެރިންގެ ބައްދަލުވުމުގައި އެމްޑީޕީން ވަނީ ފްލެޓް ލިބުނު މީހުންގެ ހައްގުތައް ހޯދަން ނިކުންނަން ޖެހިފައިވާކަން ފާހަގަކޮށް، ފްލެޓް ލިސްޓާމެދު ސަރުކާރުން ކަންކުރިގޮތުން މަޑުން ތިބެވެން ނެތްކަމަށް ވަނީ ބުނެފައެވެ.

"ގެދޮރުވެރިޔާ" ސްކީމްގެ ދަށުން ދޫކުރަން ނިންމާފައިވާ 4000 ފްލެޓް ލިބޭ ފަރާތްތަކުގެ ފައިނަލް ލިސްޓް މިދިޔަ ފެބުރުއަރީމަހުގެ 27 ވަނަ ދުވަހު އާއްމު ކުރާއިރު، ފްލެޓު ލިބޭނެ ކަމަށް ޝަރުތު ހަމަވީ 1،820 މީހުންނެވެ. 

ފްލެޓް ލިސްޓާ ގުޅޭގޮތުން މި ސަރުކާރުގެ ހައުސިން މިނިސްޓަރު ޑރ.މުއްތަލިބް ވަނީ ކުރީ ސަރުކާރުން ފްލެޓްތައް ދިނުމުގައި އުސޫލާ ހިލާފަށް ގިނަ ކަންތައްތަކެއް ކޮށްފައިވާކަން ފާހަގަކުރައްވާފައެވެ. މިގޮތުން އެންމެ ގިނައިން މައްސަލަ ހުރިކަމަށް ފާހަގަކުރެވުނީ، މާލޭގައި ދިރިއުޅުނުކަމުގެ ލިޔުން ހުށަހެޅުމުގައިކަމަށް މުއްތަލިބް ވަނީ ވިދާޅުވެފައެވެ. މީގެ އިތުރުން ދައުލަތުގެ މުއައްސަސާތަކުގެ ނަމުގައި ދޭން ނުޖެހޭ ލިޔުންތައް ދިނުމާއި، ފްލެޓް ކޮމިޓީގެ މެމްބަރުން އުސޫލާ ހިލާފަށް ކޮށްފައިވާ ކަންކަންވެސް މިނިސްޓަރު ވަނީ ހިއްސާކުރައްވާފައެވެ. މިގޮތުން ވެރިކަން ބަދަލުވިފަހުން ފްލެޓް ލިސްޓަށް ވަދެފައިވާކަން ސާބިތުވާކަމަށް މިނިސްޓަރު މުއްތަލިބް ވަނީ ވިދާޅުވެފައެވެ.