މާލޭ ބާޒާރުގައި ފިޔާ ކިލޯއެއްގެ އަގު 12 ރުފިޔާއަށް ދަށަށް ހިނގައްޖެއެވެ.

ރޯދަމަސް ފެށުމުގެ ހަފްތާއެއްކުރިން ބާޒާރުގައި ފިޔާ ކިލޯއެއް 30 ރުފިޔާއަށް ވިއްކިއިރު، ރޯދަމަހު ފިޔާވެ އަގަު ބޮޑުވެދާނެކަމުގެ ކަންބޮޑުވުން އޮތެވެ. އެހެންކަމުން ސަރުކާރުގެ އިސްނެގުމާއެކު އެސްޓީއޯއިން ވަނީ ރޯދައަށް ފިޔާ އެތެރެކުރުމަށް ނިންމައި ފުރަތަމަ ޝިޕްމަންޓް ރޯދަމަސް ފެށުމުގެ ކުރިން ބާޒާރަށް ނެރެފައެވެ. 

އެސްޓީއޯއިން ފިޔާ އެތެރެކޮށް ވިއްކަންފެށުމާއެކު ބާޒާރުގައި ފިޔާކިލޯއެއްގެ އަގުވަނީ 18 ރުފިޔާއަށް ދަށަށްގޮސްފައެވެ. އޭރު އެސްޓީއޯއިން ފިޔާ ކިލޯއެއް ވިއްކީ 16 ރުފިޔާއަށެވެ. އަދި މިހާރު އެސްޓީއޯއިން ފިޔާ ކިލޯއެއް ވިއްކަމުންދަނީ، 14 ރުފިޔާއަށެވެ. ވިޔަފާރިވެރިން ބުނާގޮތުގައި ބާޒާރުގައި ފިޔާގެ އަގު ދަށަށް ގޮސްފައިވަނީ ޑިމާންޑާ އެއްވަރަށް އެއްވެސް ދަތިކަމެއްނެތި ފިޔާ ލިބެން ފެށުމުންނެވެ. މިގޮތުން އެއްވެސް ދަތިކަމެއްނެތި އެސްޓީއޯއިންވެސް ފިޔާ ލިބޭކަމަށް އެފަރާތްތަކުން ފާހަގަކުރިއެވެ.

Advertisement

ރަމަޟާންމަހާ ދިމާކޮށް ބާޒާރުގައި ރައްޔިތުން އެންމެ އާއްމުކޮށް ބޭނުންކުރާ ކާބޯތަކެތީގެ ބާވަތްތަކުގެ އަގުތައް ބޮޑުވިޔަ ނުދިނުމަށްޓަކައި އެސްޓީއޯއިން ގެންްދަނީ، އެތަކެތި އެތެރެކޮށް ވިއްކަމުންނެވެ. މީގެ ތެރެއިން އަސާސީ ކާބޯތަކެތީގެ ގޮތުގައި ފިޔާ، އަލުވި، ކާށި އަދި ބިސް އެތެރެކޮށް ވިއްކަމުންދާއިރު، މިތަކެއްޗަކީ އަގުތައް އެންމެ ބޮޑުވެގެންދާނޭ ތަކެއްޗެވެ. ނަމަވެސް މިހާރު ކާށި ފިޔަވައި އެހެން ތަކެތީގެ އަގުތައް ދަށްވަމުން އަންނަކަން ފާހަގަކޮށްލެވެއެވެ.

ބާޒާރުގައި މިވަގުތު ކާށީގެ އަގު އިންތިހާއަށް މަތީގައި ހުރިނަމަވެސް އެސްޓީއޯ ސްޕަމާޓުގައި ކާށި ކިލޯއެއް 20 ރުފިޔާއަށް ވިއްކައެވެ.