ކަފަބުރުން ކަންފަތް ސާފުކުރުމަކީ އަހަރެމެން އެންމެންހެން އާދަވެގެން ކުރަމުން އަންނަކަމެކެވެ. ބައެއް ފަހަރު ކަންފަތް ކަހާލަން ބެނުންވިނަމަވެސް ކަފަބުރުން އެތައް އިރެންވަންދެން ކަންފަތް ކަހާލަ ކަހާލާ އިނދެވެއެވެ. އެހެން އުޅުމުގެ ތެރޭގައި ކަންފަތުގެ މާ ބޮޑަށް އެތެރެއަށް ކަފަބުރުވަދެ، އެކަމުގެ ތަދު ވެސް އިހްސާސް ކުރަންޖެހޭފަހަރު އާދެއެވެ. 

މިކަމާއި ގުޅިގެން ދާރިސް ޓީވީން ގެނެސްދިން ’ސިއްހަތު‘ ޕްރޮގްރާމުގައި ޕްރެޒެންޓަރު ކުރި ސުވާލަށް ޖަވާބު ދެއްވަމުން ކުޑަކުދިންގެ ޚާއްސަ ޑޮކްޓަރ އަހުމަދު ފައިސަލް ވިދާޅުވީ، ކަންފަތުގައި އުފެދޭ މަޑަކީ ކަންފަތުގެ ރައްކާތެރިކަމަށްޓަކައި އުފެދޭ އެއްޗެއް ކަމަށެވެ. އެހެންކަމުން ކަންފަތުގެ އެތެރެއަށް ކޮޓަންބަޑު ލައިގެން އެ ސާފުކުރަން ނުޖެހޭނެ ކަމަށެވެ. 

”(ކޮޓަން ބަޑުން ސާފުކުރުމަކީ) މެޑިކަލީ އޮންނަ ކަމެއް ނޫން. ސަގާފީ ކަމެއް ކަންނޭނގެ އެއީ. އެކަމަކު ތަދުވެގެން ނޫނީ (މަޑު) ހަރުވެގެން އެބަޖެހޭ ސާފު ކުރަން. އެކަމަކު އާއްމު އުސޫލެއްގައި އެ ސާފު ކުރާ ގޮތަށް ސާފުކުރުމެއް ނޯވޭ. “ ޑޮކްޓަރ ވިދާޅުވިއެވެ. 

Advertisement

މީގެ އިތުރުން ކަންފަތް ސާފުކުރަން އުޅުމުގެ ތެރޭގައި ކޮޓަންބަޑު ވަރަށް ބޮޑަށް ކަންފަތުގެ އެތެރެއަށް ވަންނަކަމަށާ، ނުވަތަ އޭގައި އިންނަ ކަފަކޮޅު ވެސް ކަންފަތުގެ ތެރޭގައި ހަރުލާ ކަމަށް ޑޮކްޓަރ ވިދާޅުވިއެވެ.

އަދި ކަންފަތުގެ މާބޮޑަށް އެތެރެއަށް ވަދެ، ކަންފަތުގެ ތޫރިއަށްވެސް އަނިޔާވާ ފަހަރު އަންނަކަން ޑޮކްޓަރ ފާހަގަކުރެއްވިއެވެ. އޭގެ ސަބަބުން ކަންފަތުން ލޭއައިސް އެފަދަ ކަންކަންވެސް ދިމާވާ ކަމަށް ވިދާޅުވުއެވެ. 

އެހެންކަމުން، އެފަދައިން ކަންފަތަށް އެއްޗެއް ލައްވައިގެން ސާފުކުރުމަކީ އޮންނަ ކަމެއް ނޫން ކަމަށް ޑޮކްޓަރ ވިދާޅުވިއެވެ.