ގެދޮރުވެރިޔާ ސްކިމްގެ ދަށުން އިމާރާތް ކުރެވެމުންދާ 4000 ފްލެޓް ލިބޭ ކަމަށް އެމްޑީޕީ ސަރުކާރުން އެކުލަވާލި ލިސްޓުގައި، އައިޑީކާޑުގެ އެންމެ ފަރާތެއް އަޕްލޯޑް ކޮށްފައިވާ ފަރާތެއްވެސް ހިމެނޭ ކަމަށް ގެދޮރުވެރިކަމާ ބެހޭ ވުޒާރާއިން ބުނެފިއެވެ.

އެ ވުޒާރާއިން މިކަން ހާމަކޮށްފައިވަނީ ގެދޮރުވެރިޔާ ސްކީމާ ގުޅޭގޮތުން އިދިކޮޅު އެމްޑީޕީން ދައްކަމުންދާ ވާހަކަތައް ދޮގުކޮށް މިއަދު ނެރުނު ނޫސް ބަޔާނެއްގައެވެ.

އެމްޑީޕީން ތުހުމަތު ކުރާ ގޮތުން، ފުލެޓު ލިސްޓު އާއްމުކުރިއިރު ނެރެފައިވަނީ މުޅި ލިސްޓެއް ނޫނެވެ. އަދި، ލިސްޓު ނެރުނު އިރު މީގެ ކުރިން ޝަރުތުހަމަވެ ފުލެޓު ލިބުނު މީހުންގެ ނަންތައް ކަނޑާފައިވާ ކަމަށާ އެ ސަރުކާރުން 4،000 ފުލެޓު ލިބޭ ކަމަށް ކަނޑައަޅައިފައިވާ ފޯމުތަކުގެ ބޭރުން މި ސަރުކާރުން 577 މީހެއްގެ މައުލޫމާތު އަލުން ބަލައި ފުލެޓު ދޭން ކަނޑައެޅި ކަމަށް ވެސް އެމްޑީޕީން ބުންޏެވެ.

އެކަން ދޮގުކޮށް ގެދޮރުވެރިކަމާ ބެހޭ ވުޒާރާއިން ނެރުނު ނޫސް ބަޔާނުގައި ބުނީ، މިދިޔަ މަހުގެ 27 ވަނަ ދުވަހު ނެރެފައިވާނީ ކުރީ ސަރުކާރުން އިޢުލާން ކުރި ލިސްޓުގައި ބަޔާންވެގެންވާ ފަދައިން 3 ކޮޓަރި ފްލެޓަށް އެދި ފޯމުލީ ފަރާތްތަކުގެ ތެރެއިން 76 ޕޮއިންޓް ލިބި ފްލެޓް ލިބޭނެ ކަމަށް ކަނޑައަޅާފައިވާ ފަރާތްތަކާއި، 75 ޕޮއިންޓް ލިބި ގުރުއަތަށް ދާނެ ކަމަށް އިޢުލާންކޮށްފައިވާ ފަރާތްތަކާއި، އަދި 2 ކޮޓަރި ފްލެޓަށް އެދި ފޯމުލީ ފަރާތްތަކުގެ ތެރެއިން 73 ޕޮއިންޓް ލިބި ފްލެޓް ލިބޭނެ ކަމަށް އިޢުލާންކޮށްފައިވާ ފަރާތްތައް ކަމަށެވެ. 

”އެނޫން އެއްވެސް ފަރާތެއްގެ ފޯމެއް މި މަރުޙަލާގައި ބަލައި ޗެކްކޮށްފައިނުވާނެއެވެ. އަދި ފްލެޓް ދިނުމުގައި ޢަމަލުކުރާނެ އާ އުޞޫލެއްވެސް އެކަށައަޅާފައެއް ނުވާނެއެވެ. މިކަމުގައި ޢަމަލުކޮށްފައިވަނީ ލިޔެ ރަސްމީކޮށް އިޢުލާނުކޮށް ޝާއިޢުކޮށްފައިވާ އުޞޫލުގައި ބަޔާންކޮށްފައިވާ ގޮތަށާއި ފޯމުތައް އިވެލުއޭޓް ކުރުމަށް ކުރީ ސަރުކާރުން އެކަށައެޅި ގެދޮރުވެރިން ކޮމިޓީގެ މަސައްކަތް ކުރިއަށް ގެންދިއުމަށް އެކަށައަޅާފައިވާ ގައިޑްލައިންގައި ބަޔާންކޮށްފައިވާ ގޮތަށެވެ. މި ދެންނެވި އުޞޫލު އަދި ގައިޑްލައިނަށް ޢަމަލު ކުރުމުގައި ހުރިހާ ފަރާތަކަށްވެސް ހަމަހަމަ ވާނެހެން ވީހާވެސް ބޮޑަކަށް ލުއި ކުރެވޭތޯ ބަލާފައިވާނެއެވެ.“ މިނިސްޓްރީގެ ބަޔާނުގައި ބުނެފައިވެއެވެ. 

އަދި ފުލެޓު ލިބިފައިވާ އެއްވެސް ފަރާތަކަށް ކަނޑައަޅާފައިވާ ފުލެޓު، މިހާތަނަށް އެހެން ފަރާތަކަށް ހަމަޖައްސާފައި ނުވާނެ ކަމަށާ ހުށަހަޅާ ޝަކުވާތަކަށް ބެލުމަށްފަހު ނޫނީ އެއްވެސް ފަރާތަކަށް ލިބިފައިވާ ފުލެޓެއް އެހެން ފަރާތަކަށް ދިނުމަށް ކަނޑައެއްނާޅާނެ ކަމަށް އެ ވުޒާރާއިން ބުންޏެވެ.

އެ ވުޒާރާއިން އިތުރަށް ބުނީ މާލޭގައި ރަށްވެހިވެފައިވާ ފަރާތެއް ރަށްވެހިވެފައިވާތާ 15 އަހަރު ވެފައިވާނަމަ ޑިސްކޮލިފައި ނުވާނެ ކަމަށާ މާލޭގެ ރަށްވެއްސަކަށް ވީތާ 15 އަހަރު ނުވާނަމަ، އެ މުއްދަތުގައި މާލޭގައި އުޅުނުކަން ބެލުމަށް ލިޔުންތަކަށް ބަލާފައިވާނެ ކަމަށެވެ. 

”އެއްވެސް ފަރާތަކަށް ލިބިފައިވާ ޕޮއިންޓަށް ބަދަލު އައިސްފައިވާނަމަ އައިސްފައިވާނީ ފޯމުލީ ފަރާތުން ދީފައިވާ މަޢުލޫމާތާއި ޚިލާފަށް ޕޮއިންޓް ދީފައިވާނަމައެވެ. އެކަން ފޯމު ލީ ފަރާތްތަކަށް ޕޯޓަލްއިން އެނގެން ހުންނާނެއެވެ.“ ގެދޮރުވެރިކަމާބެހޭ ވުޒާރާއިން ބުންޏެވެ. 

މީގެ އިތުރުން، ކައުންސިލްތަކުން ދީފައިވާ ލިޔުންތަކުގެ ތެރޭގައި ފާހަގަކުރެވިފައި ވަނީ މާލެ ސިޓީ ފިޔަވައި އެހެން ސިޓީތަކާއި ރަށްތަކުގެ ކައުންސިލްތަކުން ދީފައިވާ ލިޔުންތައް ކަމަާ އެހެންކަމުން ލިޔުންތަކުގެ ތެރޭގައި މާލެ ސިޓީ ކައުންސިލުން ރައީސް ޑރ. މުހައްމަދު މުއިއްޒުގެ މޭޔަރުކަމުގައި ލިޔުން ދީފައި ހުރި ވާހަކައަކީ ހަގީގަތެއް ނެތް ވާހަކައެއް ކަމަށް އެ ވުޒާރާއިން ބުންޏެވެ.

”ދެމަފިރިންނަށް އެއް ސްކީމަކުން ފްލެޓް ދިނުމަކީ ސަރުކާރުގެ ސިޔާސަތެއްނޫނެވެ. އަދި ދެމަފިރިންނަށް މި ސްކީމުގެ ތެރެއިން 2 ފްލެޓެއް ނުލިބޭނެއެވެ. 15 ނޮވެންބަރު 2023 ގައި އިޢުލާންކުރި ލިސްޓުގައި ނެތް ފަރާތެއް މި ލިސްޓުގައި ހިމަނާފައި ނުވާނެއެވެ. އަދި ދެ މަފިރިން ހިމެނިފައިވާނަމަ އެދެފަރާތަށް ވަކިން 2 ފްލެޓެއް ނުލިބޭނެއެވެ.“

މިއާއެކު އެ ވުޒާރާއިން ބުނީ މި 4،000 ފުލެޓު ލިބުމުގެ ފުރުސަތު ނުލިބޭ ފަރާތްތައް އަލުން ބޯހިޔާވަހިކަމަށް ހުށަހެޅުމުގެ ތަކުލީފު ތަހައްމަލުކުރަން ނުޖެހޭނެ ކަމަށެވެ. އަދި ބޯހިޔާވަހިކަމާއި ގެދޮރުވެރިކަމަށް ބޭނުންޖެހިފައިވާ ކޮންމެ ދިވެހި ރައްޔިތަކަށް އެ ފުރުސަތު ކަށަވަރުކޮށްދިނުމަށް ރައީސް މުއިއްޒު ވެވަޑައިގެންފައިވާ ވައުދުގެ ދަށުން އެ ފަރާތްތަކަށް ވެސް މި ދައުރުގައި ބޯހިޔާވަހިކަމުގެ ފުރުސަތު ލިބޭނެކަމަށް އެ ވުޒާރާއިން ބުންޏެވެ.