މާދަމާ ރެއަށްފަހު ރޯދަ ހަދިޔާގެ ގޮތުގައި ސަރުކާރުން ދޭ މަސްދަޅުކޭސް ދޫކުރުން ދެން ކުރިއަށްގެންދާނީ މިފްކޯގެ ފިހާރަތަކުންކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވުޒާރާއިން ބުނެފިއެވެ.

އެ ވުޒާރާއިން ނިންމާފައިވަނީ މަސްދަޅުކޭސް ބޭހުމުގެ ކަންކަން މިރެއާއި މާދަމާ ރޭ 13 މަރުކަޒެއްގައި ކުރިއަށްގެންދާށެވެ. އެއަށްފަހު ދެން މަސްދަޅުކޭސް ބެހުމުގެ ކަންކަން ކުރިއަށްގެންދިއުމަށް ނިންމާފައިވަނީ މާލެ ސަރަހައްދުގައިވާ މިފްކޯގެ ފިހާރަތަކުންނެވެ.

މިކަމާ ގުޅޭގޮތުން ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވުޒާރާގެ ވަޒީރު، އެކްސްގައި ކުރެއްވި ޕޯސްޓެއްގައި ވިދާޅުވީ، މިހާހިސާބަށް އާއިރު ގިނަ ގޭބިސީތަކަކަށް ހަދިޔާ ދޫކޮށް ނިމިފައިވާކަމަށެވެ. އެގޮތުން މިހާތަނަށް އާއިރު، މާލެ ސަރަޙައްދުގައި 48 ހާސް ގޭބިސީއަށް ރޯދަ ހަދިޔާ ފޯރުކޮށްދެވިފައިވާކަމަށް ވަޒީރު ވިދާޅުވިއެވެ. ވަޒީރު ވިދާޅުވީ، މާޗް 11 ވަނަ ދުވަހުން ފެށިގެން، ރޯދަ ހަދިޔާ ދޫކުރާނީ މިފްކޯގެ ފިހާރަތަކުން ކަމަށެވެ. އެގޮތުން މާލެ އަދި ހުޅުމާލޭގައި ހުރި މިފްކޯގެ 4 ފިހާރަ ހުޅުވިފައި ހުންނަ ގަޑި ތަކުގައި ދޫކުރުން ކުރިއަށްގެންދާނޭކަމަށެވެ.

ރޯދަ ހަދިޔާ ދޫކުރާ މަރުކަޒުތައް 11 ވަނަ ދުވަހުން ފެށިގެން ބަދަލުވީ ނަމަވެސް، ދޫކުރުން ކުރިޔަށްދާނީ މިހާރެކޭ އެއްގޮތަށް، އޮންލައިން ޓޯކަން ނިޒާމުގެ ތެރެއިންނެވެ. އަދި ބޭނުންވާ ހުރިހާ ފަރާތްތަކަށް ލިބެންދެން ކުރިޔަށްދާނޭކަމަށް މިނިސްޓަރު ތަކުރާރުކުރެއްވިއެވެ.