ސިޔާސީ ދާއިރާގައި އަންހެނުން ބާރުވެރިކުރުވާ އަންހެނުންނާއި ދެކޮޅަށް ކުރެވޭ އަނިޔާ ހުއްޓުވުމުގެ އެއްބަސްވުމުގައި ހަތް ޕާޓީއަކުން ސޮއިކޮށްފި އެވެ.

ފޮރިން ކޮމިއުނިކޭޝަން އެންޑް ޑިވެލޮޕްމަންޓް އޮފީހުން ބުނީ މި އެއްބަސްވުމުގައި ރާއްޖޭގައި އުފެދިފައިވާ ނުވަ ޕާޓީގެ ތެރެއިން ހަތް ޕާޓީއަކުން ސޮއިކޮށްފައިވާ ކަމަށެވެ. އެއީ އަދާލަތު ޕާޓީއާ އެމްޑީޕީ އާއި އެމްޑީއޭ އާއި އެމްއެންޕީ އާއި ޕީއެންސީ އަދި ޕީއެންއެފްގެ އިތުރުން ދަ ޑިމޮކްރެޓްސް އެވެ.

ވެސްޓް މިނިސްޓަރު ފައުންޑޭޝަން ފޯ ޑިމޮކްރަސީގެ އިސްނެގުމާއެކު މި ޕާޓީޓަކުގެ މެދުގައި ވެވުނު އެއްބަސްވުމަކީ ސިޔާސީ ދާއިރާފައި އަންހެނުން ބާރުވެރިކޮށް އަންހެނުންނަށް ކުރިމަތިވާ އަނިޔާގެ މައްސަލަ ބަލައިގަނެ އެކަމާ ދެކޮޅަށް ސިޔާސީ ޕާޓީތަކުން އެކުގައި ގުޅިގެން މަސައްކަތް ކުރުމަށް ދިވެހިރާއްޖޭގެ ތާރީޚުގައި އިގުރާރުވި ފުރަތަމަ ފަހަރެވެ.

މިއީ ރާއްޖޭގެ ސިޔާސީ މަސްރަހާ ގުޅޭގޮތުން ފުޅާ ދާއިރާއެއްގައި ކުރެވުނު ދިރާސާތަކުގެ މައްޗަށް ބިނާކޮށް އެކުލަވާލާފައިވާ އެއްވަސްވުމެއް ކަމަށާ މި އެއްބަސްވުމުގައި ސިޔާސީ ދާއިރާގައި އަންހެނުން ބާރުވެރިކުރުވާ އަންހެނުންނާއި ދެކޮޅަށް ކުރެވޭ އަނިޔާ ހުއްޓުވުމަށް އަޅަން ޖެހޭ ފިޔަވަޅުތައް ތަފްސީލުކޮށް ބަޔާންކޮށްފައިވާ ކަމަށެވެ.

މި ފިޔަވަޅުތަކުގެ ތެރޭގައި ޕާޓީތެރޭގެ ސިއްރު ހިފެހެއްޓޭ ޝަކުވާގެ ނިޒާމެއް ގާއިމު ކުރުމާއި ޖަވާބުދާރިވުމުގެ ހަރުދަނާ ނިޒާމެއް ގާއިމު ކުުރުމާއި ސިޔާސީ ގޮތުން ހަމަހަަމަ ފުރުސަތުތައް ކަށަވަރު ކޮށްދިނުމަށް އުސޫލު އެކުލަވާލުމާއި ޕާޓީތަކުގެ ތެރޭގައި ހޭލުންތެރިކަމާއި ގާބިލުކަން އިތުރުކުރުމުގެ ޕްރަގްރާމްތަކަށް ހާއްސަ ބަޖެޓެއް ކަނޑައެޅުން ފަދަ ކަންކަން ހިމެނެ އެވެ.