ނޭޝަނަލް ޑިޒާސްޓަރ މެނެޖްމަންޓް އޮތޯރިޓީ (އެންޑީއެމްއޭ) އިން ގިނަ އަދަދެއްގެ ނައިލޯނު ގޯނި ސަޕްލައިކޮށްދޭނެ ފަރާތެއް ހޯދުމަށް އިއުލާނުކޮށްފިއެވެ.
ޑިޒާސްޓާ އޮފީހުން ކޮށްފައިވާ އިއުލާނެއްގައި ބުނެފައިވަނީ، އެއޮތޯރިޓީއަށް 70،000 (ހަތްދިހަ ހާސް) ނައިލޯނު ގޯނި ބޭނުންވާކަމަށެވެ. ނައިލޯނު ގޯނި ސަޕްލައިކޮށްދިނުމަށް ޝައުގުވެރިވެ ވަޑައިގަންނަވާ ފަރާތްތަކުން މިހިނގާ މާޗްމަހުގެ 19 ވާ ބުދަ ދުވަހުގެ 11:00 އަށް އެ އޮތޯރިޓީ އަށް ވަޑައިގެން އަންދާސީހިސާބު ހުށަހެޅުމަށް ޑިޒާސްޓާއިން ބުނެއެވެ. ޑިޒާސްޓާ އޮފީހުން ހޯދުމަށް އިއުލާނުކޮށްފައިވަނީ 22 އިންޗި ފުޅ އަދި 36 އިންޗި ދިގުމިން ހުންނަ ގޯންޏެވެ.
އެ ގޯނިތަކުގެ ބޭނުމަކީ ގޯނިތަކަށް ވެލިއެޅުމަށްފަހު ފެންބޮޑުވާ ދުވަސްވަރު ޖެހުމަށްކަމަށް ޑިޒާސްޓާ އޮފީހުން ބުނެއެވެ. ސަޕްލައިކޮށްދޭ ގޯނިތައް ވާންޖެހޭނީ ހުދު ގޯނިތަކަށް ކަމަށްވެސް އެ އިއުލާނުގައި ވަނީ ބަޔާންކޮށްފައެވެ.
ޑިޒާސްޓާ އޮފީހުން ނައިލޯނުގޯނި ހޯދުމަށް އިއުލާނުކޮށްފައިވާއިރު، އެންމެ ފަހުން ރާއްޖެއަށްކުރި ވިއްސާރައިގައި އެ އޮތޯރިޓީން ވަނީ ރާއްޖޭގެ އެކި ސަރަހައްދުތަކަށް ހުސްގޯނީގެ އިތުރުން ވެލިބަސްތާ ފޯރުކޮށްދީފައެވެ. އެންމެފަހުން މާލެއަށްކުރި ވިއްސާރައިގައިވެސް އެކި ސަރަހައްދުތަކަށް ދެހާހަށްވުރެ ގިނަ ވެލިބަސްތާ ޖެހުމަށް ފޯރުކޮށްދީފައިވާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
