ހުޅުމާލެ ޕަވަރހައުސް އެންކްސް 2 ގައި 80،000 ލީޓަރުގެ ދެ ތެޔޮ ޓޭންކް ބެހެއްޓުމަށްޓަކައި އެމްޓީސީސީއާއެކު ސްޓެލްކޯއިން އެއްބަސްވުމެއްގައި ސޮއި ކޮށްފިއެވެ.

މި އެއްބަސްވުމުގައި އެމްޓީސީސީގެ ފަރާތުން ސޮއި ކުރެއްވީ މެނޭޖިންގ ޑިރެކްޓަރ އަހުމަދު ސައުދީއެވެ. އަދި ސްޓެލްކޯގެ ފަރާތުން ސޮއި ކިރެއްވީ، މެނޭޖިންގ ޑިރެކްޓަރ ހުސައިން ފަހުމީއެވެ. 

ސްޓެލްކޯއިން ބުނީ، ތެޔޮ ޓޭންކު ބެހެއްޓުމަށް ނިންމާފައިވަނީ ޕީކް ސީޒަނަށް ތައްޔާރުވުމުގެ އިތުރުން ގްރޭޓާމާލޭ ޕަވަރ ޖެނެރޭޝަން ބެކަޕްގެ ގޮތުގައި ކަމަށެވެ.

Advertisement

މި އެއްބަސްވުމާގުޅެގެން އެމްޓީސީސީން ބުނީ ހުޅުމާލެ ފުރަތަމަ ފިޔަވަހީގައި ޤާއިމްކުރާ ޓޭންކުތަކުގެ ސަބަބުން ކަރަންޓުގެ ޑިމާންޑް އެންމެ ބޮޑުވާ ވަގުތުތަކުގައި ޚިދުމަތް ފޯރުކޮށްދިނުމަށް ބޮޑު އެހީތެރިކަމެއް ލިބިގެންދާނެކަމަށެވެ.

މިދުވަސްވަރަކީ ހޫނު ދުވަސްވަރަކަށްވުމާއެކު ކަރަންޓު ބޭނުންކުރާ މިންވަރު ދުވަހެއް ދުވަހަކަށް އަންނަނީ އިތުރުވަމުންނެވެ. މިވަގުތު މާލޭ ސަރަޙައްދުގައި ޕީކް ގަޑީގައި ބޭނުންކުރާ ކަރަންޓު 98 މެގަވޮޓްއަށް އަރައެވެ. ކުރިއަށް އޮތް ދުވަސްތަކުގައި މި އަދަދު މިއަށްވުރެ އިތުރުވާނެކަމަށް ސްޓެލްކޯއިން ލަފާކުރެއެވެ.