ބޭންކުން ނަގާފައިވާ ލޯނަކަށް ފައިސާ ނުދައްކައިގެން ނީލަމުގައި މާލޭގެ ގެއެގެ ވިއްކާލަން މީގެ ކުރިން ކަނޑައެޅި އަގު ކުޑަކޮށް އެ ގެ ވިއްކާލުމަށް ބޭންކް އޮފް މޯލްޑިވްސް (ބީއެމްއެލް) އިން އިއުލާނުކޮށްފިއެވެ.

އެގޮތުން އިއުލާނުކޮށްފައިވަނީ ސަންފްރަންޓް ލައިޓްޝޮޕް ގޯޅިތެރޭގައި ހުންނަ މ. ނާއިންފަރުއާގެއެވެ.

ބޭންކުން މީގެ ކުރިން ކުރި ދެފަހަރެއްގެ މަތިން އެ ގެ ނިލާމުގައި ވިއްކާލަން އިއުލާން ކުރި އިރު، އެ އިއުލާނުގައި ވާގޮތުން، މ. ނާއިންފަރުއާގެ ވިއްކާލަން ނީލަން ފެށޭ އެންމެ ދަށް އަގަކީ 10 މިލިއަން ރުފިޔާއެވެ. ނަމަވެސް މިފަހަރު ކުރި އިއުލާނުގައި ވާގޮތުން، މ. ނާއިންފަރުއާގެ ވިއްކާލަން ނީލަން ފެށޭ އެންމެ ދަށް އަގަކީ 8 މިލިއަން ރުފިޔާއެވެ. 

މިއީ 792 އަކަފޫޓުގެ ގެއެކެވެ. އެ ގެ ގަންނަން ނީލަން ހުށަހެޅުމުގެ މުއްދަތު ހަމަވާނީ މި މަހުގެ 24 ވަނަ ދުވަހުއެވެ.

ބީއެމްއެލުން ބުނީ ގެތައް ވިއްކާލެވޭނީ، މުއްދަތު ހަމަވާ ތާރީހާ ހަމަޔަށް ސިޓީ ހުށަހަޅާ ފަރާތްތަކުގެ ތެރެއިން އެވަގުތު އެތަނަށް ހާޒިރުވެ ތިބި ފަރާތްތަކުގެ ހާޒިރުގައި އެންމެ މަތީއަގު ހުށަހެޅި ފަރާތަކަށް ކަމަށެވެ.

އަދި އެންމެ ބޮޑު އަގެއް ހުށަހެޅި ފަރާތް ކަނޑައަޅާނީ ހުށަހަޅާ އަގު އެންމެ މަތީ އަގުގެ ގޮތުގައި ބަދަލެއް ނައިސް ފަސް ދުވަހުގެ މުއްދަތަކަށް އޮތުމުން ކަމަށެވެ.

ބޭންކުގެ އިއުލާނުގައި ބުނެފައިވަނީ ނީލަން ނިމުމުން އެންމެ މަތީ އަގު ހުށަހަޅާ ފަރާތަކަށް އެކަން އަންގާނެ ކަމަށާއި، ބޭންކުން އެކަން އަންގާ ތާރީޚުން ފެށިގެން ސަރުކާރު ބަންދު ދުވަސްތައް ނުހިމަނައި 10 ދުވަހުގެ ތެރޭގައި، ނުވަތަ ބޭންކުން އިތުރުކޮށްދޭ މުއްދަތެއްގެ ތެރޭގައި އެ ފަރާތަކުން ހުށަހެޅި ޖުމްލަ އަގަށްވާ ފައިސާ ބޭންކަށް ދައްކަން ޖެހޭނެ ކަމަށެވެ. 

މި މުއްދަތުގެ ތެރޭގައި ފައިސާ ނުދައްކައިފިނަމަ އެ ހުށަހެޅުން ބާތިލް ކުރުމަށް ފަހު ދެވަނައަށް އެންމެ މަތީ އަގު ހުށަހެޅި ފަރާތައް ނީލަން ނިންމާލުމުގެ ނުވަތަ ނީލަން އަލުން ފެށުމުގެ ހައްގު ބޭންކަށް ލިބިގެން ވެއެވެ.