ރާއްޖޭގެ މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީގެ މެންޑޭޓުން ބޭރުން ކަންކަން ކުރަން އުޅޭކަމަށްބުނެ، އެކަމުގެ ކަންބޮޑުވުން އިދިކޮޅު އެމްޑީޕީން ފާޅުކޮށްފިއެވެ.

އެމްޑީޕީގެ އިގްތިސޯދީ ކޮމިޓީގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކުރީގެ މާލީ ވަޒީރު އިބްރާހިމް އަމީރު ވަނީ އެމްއެމްއޭއިން ރިއަލް އެސްޓޭޓްގެ ތެރެއަށް ވަންނަން އުޅޭތީވެ އެކަމުގެ ކަންބޮޑުވުން ފާޅުކުރައްވައި ވާހަކަދައްކަވާފައެވެ. އަމީރު ވިދާޅުވީ އެމްއެމްއަކީ ރާއްޖޭގެ އިގްތިސާދުގައި ވަރަށް މުހިއްމު ދައުރެއް އަދާކުރާ މުއައްސަސާއެއް ކަމަށާއި، އެމްއެމްއޭއަކީ މާލީ އިދާރާއެއްކަން ހަނދާންކުރަން ޖެހޭނޭކަމަށެވެ. 

އަމީރު ވިދާޅުވީ މާލީ އިދާރާތަކުން އާމްދަނީ ހޯދޭނެ ގޮތްތައް ކަނޑައެޅިގެން ބަޔާންކޮށްފައި އެބައޮތްކަމަށާއި، މަރުކަޒީ ބޭންކުން އާމްދަނީ ހޯދާނީ މާލީ މުދަލާއި އެއާގުޅޭ މުއާމަލާތްތަކުން ކަމަށެވެ. އެމްއެމްއޭގެ މަނިޓަރީ ޕޮލިސީގެ ބޭނުމަށް ރާއްޖޭގެ މަނީ ސަޕްލައި އިތުރުކުރުމަށް ބޭނުންވިނަމަވެސް އެކަންކުރެވޭނެ އިންވެސްޓްމަންޓްސްތައް އެ ބޭންކުގެ ޤާނޫނުގެ ތެރެއިން މިހާރުވެސް ފަހިވެފައި އެބައޮތްކަމަށެވެ. މިސާލަކަށް އިންޓަރަސްޓް ރޭޓް ދަށްކޮށްގެންނާއި، އޯޕަން މާކެޓް އޮޕަރޭޝަންސް ފަދަ ވަސީލަތްތަކަކީ އެމްއެމްއޭއަށް އާމްދަނީ އިތުރުކުރުމަށް ބޭނުންކުރެވިދާނެ ގޮތްތަކެއްކަމަށް އަމީރު ފާހަގަކުރެއްވިއެވެ.

Advertisement

ރާއްޖޭގެ އިމާރާތްކުރުމުގެ ދާއިރާފަދަ ސިނާއަތްތަކަށް އެމްއެމްއޭއިން ވަނުމަކީ ވަރަށްބޮޑު ނުރައްކަލެއްކަން ފާހަގަކުރައްވަމުން އަމީރު ވިދާޅުވީ، ރާއްޖޭގެ އަމިއްލަ ވިޔަފާރީގެ ތެރެއަށް އެމްއެމްއޭއިން ވަނުމަކީ ވަރަށްބޮޑު ގޯހެއްކަމަށެވެ. އެ ފަދަ ވިޔަފާރިތަކަށް ވަންނަނަމަ، މަރުކަޒީ ބޭންކްގެ ހައިސިއްޔަތުން އަމިއްލަ ވިޔަފާރިތަކަށް ފައިނޭންސް ނުކޮށްދޭންވީ ސަބަބަކީ ކޮބައޮތޯ އަމީރު ވަނީ ސުވާލު އުފައްދަވާފައެވެ.

އަމީރު ވިދާޅުވީ މިހާރުވެސް ހުޅުމާލޭގައި މަސައްކަތް ކުރިއަށްނުގޮސް ހުއްޓިފައިހުރި ހައުސިން މަޝްރޫޢުތައް އެބަހުރިކަމަށާއި، ހަމަ އެގޮތަށް ރާއްޖޭގައި ނުހެދިހުރި ރިސޯޓްތައްވެސް އެބަހުރި ކަމަށެވެ. އެހެންކަމުން އެފަދަ ކަންކަމަށް ފައިނޭންސް ނުކުރައްވަނީ ކީއްވެގެންތޯ އަމީރު ވަނީ އުވާލު ކުރައްވާފައެވެ.

މަރުކަޒީ ބޭންކުން ރިއަލް އެސްޓެޓް ވިޔަފާރީގެ ތެރެއަށް ވަނުމަށް ނިންމާފައިވާކަމަށް ބުނެ އެމްޑީޕީން ކަންބޮޑުވުން ފާޅުކޮށްފައިވާއިރު، އެމްއެމްއޭއިން ހުޅުމާލެއިން ބިންގަތުމުގެ ނަމުގައި ގިނަ އަދަދެއްގެ ފައިސާ ޗާޕްކުރަން އުޅޭކަމަށް އިދިކޮޅު ބައެއް ފަރާތްތަކުން ދަނީ ވާހަކަދައްކަމުންނެވެ. ނަމަވެސް މިކަމާ ގުޅޭގޮތުން އެމްއެމްއޭއިން އަދި ވަކި އެއްޗެކޭ ބުނެފައެއް ނުވެއެވެ.