ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ދެކުނުގެ 6 ރަށެއްގައި މަގުތައް ހެދުމުގެ މަސައްކަތް ކަނޑައެޅިފައިވާ ތާވަލާ އެއްގޮތަށް ކުރިއަށްދާކަމަށް އެ ކުންފުނިން ބުނެފިއެވެ.

އާރުޑީސީން މިވަގުތު ދެކުނުގެ 6 ރަށެއްގެ މަގުތައް ހެދުމުގެ މަސައްކަތް ކުރިއަށްދާއިރު، އެ ރަށްތަކަކީ، ތ.ތިމަރަފުށި،ގއ.ވިލިނގިލި، ގއ.ކޮލަމާފުށި، ލ.ގަން ފޭސް ދޭއްގެ އިތުރުން ގދ.ގައްދޫ އާއި ގދ.ތިނަދޫ ފޭސް ދޭއްގެ މަގުހެދުމުގެ މަސައްކަތެވެ.

އެ ރަށްތަކުގެ މަގުހެދުމުގެ މަސައްކަތް ކުރިއަށްދާގޮތަށް ބަލާއިރު، ލ.ގަމު ފޭސް ދޭއްގެ އިޖުތިމާއީ ހިނގުމުގައި ސްޓޯމްވޯޓަރ ޖަންކްޝަން ބެހެއްޓުމުގެ މަސައްކަތް ކުރިއަށްދާއިރު، ބޮޑުތަކުރުފާނުމަގު އެއްވަރުކުރުމުގެ މަސައްކަތް ދަނީ ކުރިއަށެވެ. ގއ.ކޮލަމާފުށީ އަމީނީމަގުގެ ދުވާރުހެދުމުގެ މަސައްކަތް ކުރިއަށްދާއިރު، އެރަށުގެ ޗާންދަނީމަގު އެއްވަރުކުރުމުގެ މަސައްކަތް ދަނީ ކުރިއަށެވެ. ގއ.ވިލިނގިލީ ފޭސް ދޭއްގެ މޫސާ މަގުގައި ކާރބް ސްޓޯން ޖެހުމުގެ މަސައްކަތް ކުރިއަށްދާއިރު، ބަރާސީލްމަގުގައި ދުވާރު ހެދުމުގެ މަސައްކަތްދަނީ ކުރިއަށެވެ.

Advertisement

މީގެ އިތުރުން އިތުރު ރަށްތަކުގެ މަގުތައް ހެދުމުގެ މަސައްކަތްވެސް ކުރިއަށްދާކަމަށް އާރުޑީސީން ބުނެއެވެ. އާރުޑީސީން ގެންދަނީ ޒަމާނީ ފެންވަރަށް މަގުތައް ތަރައްގީ ކުރުމުގެ ހަތް މަޝްރޫއުއެއް ސެންޓްރަލް ރީޖަންގެ ރަށްތަކުގައި ހިނގަމުންނެވެ. އޭގެ ތެރޭގައި ނ. ހޮޅުދޫ އާއި ވެލިދޫ އާއި ޅ. ހިންނަވަރާއި މ. މުލަކާއި އއ. ތޮއްޑޫ އާއި އދ. މާމިގިލި އަދި ދ. ކުޑަހުވަދޫ ހިމެނެއެވެ.