މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބޯޑުގައި ފިނޭންސް މިނިސްޓްރީން ތަމްސީލު ކުރައްވަމުން ގެންދެވި މުހައްމަދު ޒަޔާން އަހުމަދު އިސްތިއުފާ ދެއްވާފައި ވަނިކޮށް އެ ބޯޑްގައި އިކޮނޮމިކް މިނިސްޓްރީ ތަމްސީލު ކުރައްވާ ޝުހާދު އިބްރާހިމް ވެސް އިސްތިއުފާ ދެއްވައިފި އެވެ.

މި ދެ ބޭފުޅުން އިސްތިއުފާ ދެއްވާފައިވާކަން އެމްއެމްއޭގެ އޮފިޝަލަކު ވަނީ ވޮއިސްއަށް ޔަަގީންކޮށް ދެއްވާފަ އެވެ.

އޮފިޝަލް ވިދާޅުވި ގޮތުގައި ޒަޔާން މަގާމުން އިސްތިއުފާ ހުށައަޅުއްވާ ނޯޓިސް ވަނީ ދެއްވާފަ އެވެ. ޒަޔާން އެ މަގާމުގަައި އަދި އިތުރު ދެ މަސް ދުވަހު ހުންނަވާނެ އެވެ.

Advertisement

ޝުހާދު އިސްތިއުފާ ދެއްވީ އިއްޔެ އެވެ. އިސްތިއުފާ ދެއްވާ އޭނާގެ ކަންބޮޑުވުންތައް ގަނަވަރުނަރު މުނައްވަރަށް ވަނީ ސިޓީއަކުން ދަންނަވާފަ އެވެ.

މި ދެ ބޭފުޅުން ވެސް މަގާމުން ވަކިވެވަޑައިގަތުމާއި ގުޅިފައި ވަނީ ސަރުކާރުން މަރުކަޒީ ބޭންކް އެމްއެމްއޭ މެދުވެރިކޮށް 15 ބިލިއަން ރުފިޔާ ޗާޕްކުރުމުގެ މަސައްކަތް ކުރާ ކަމަށް ކުރެވޭ ތުހުމަތެވެ. އެ ނިންމުން ބަދަލު ކުރަން ބޯޑްގައި ތިއްބެވި ބައެއް ބޭފުޅުން ވަނީ ބާރު އަޅުއްވާފަ އެވެ.

މަގާމުން އިސްތިއުފާ ދެއްވީ އެކަމުގައި އަލިމަގެއް ނުފެނުމުން ކަމަށް ވެ އެވެ.

ފައިސާ ޗާޕުނުކޮށް ދައުލަތް ހިންގުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. މިހާރު އޮތް ތުހުމަތުތަކާއި ގުޅޭގޮތުން ސަރުކާރުން އަދި ރަސްމީކޮށް ވާހަކައެއް ނުދައްކަ އެވެ.