ރާއްޖޭގެ ފަތުވާ ކޮމެޓީން ދައްކަނީ “ހޫރައްލީނުން” ގެ ވާހަކަ ކަހަލަ ބޭކާރު ވާހަކަ ކަމަށް ވިދާޅުވެ އެމްޑީޕީގެ އަންހެނުންގެ ރޫހުގެ ރައީސާ ރޮޒައިނާ އާދަމް ދެއްކެވި ކުފުރުގެ ވާހަކަތަކާއި ގުޅިގެން ހޫނުފެނަށް ވެއްޓި ފާޑުކިޔުން ބޮޑުވުމުން މާފަށް އެދިއްޖެ އެވެ.

ރޮޒައިނާ މިއަދު ވަނީ އޭނާ ޓީވީ ގައި ދެއްކިވާހަކައެއްގެ މާނަ ވަރަށް ބޮޑަށް އޮޅުން އަރާ ގޮތަށް ސޯޝަލް މީޑިއާގައި ދައުުރުވަމުންދާ ކަމަށް ބުނެ ސްޓޭޓްމަންޓެއް އާންމުކޮށްފަ އެވެ.

އެ ސްޓޭޓްމަންޓްގައި ވެސް ފުރަތަމަ މަސައްކަތް ކުރީ އޭނާ ދެއްކި ވާހަކަތައް ދެކޮޅު ޖެއްސުމަށެވެ. އަދި އޭނާ ދެއްކި ވާހަކަތަކުގެ މާނަ ބަޔަކު އޮޅުވާލީ ކަމަށް ދައްކާށެވެ. ވިދާޅުވީ އޭނާ ދެންނެވީ ފަނޑިޔާރުންނަށް ނުފޫޒު ފޯރުވުމަކީ ދީނީ ގޮތުން ކިހާ ގޯސްކަމެއްކަން ވެރީންނަށް އަންގައި ދިނުމަށް ފަތުވާ މަޖިލީހުން ވެސް މަސައްކަތް ކުރަން ޖެހޭ ކަަމަށެވެ.

އަދި ވިދާޅުވީ ހޫރައްލީނުންނޭ ކިޔާފައި އޭނާ ދެއްކި ވާހަކާގައި "ބޭކާރު" މި ލަފުޒު ގެނެވިފައި ވާތީ އެކަމުގެ މާނަ ބައެއް މީހުންނަށް އޮޅިފައިވާ ކަމަށެވެ. 

"ބޭކާރޭ އަޅުގަނޑު ބުނީ މި ވަގުތާއި ހާލަތުގައި ދައްކަން އެއަށްވުރެ މުހިންމު މިހާލަތާ ގުޅޭ ދީނީ ވާހަކަތައް ހުރިކަން ބަޔާންކޮށްދޭން. އެ ވާހަކަ އަކީ ބޭކާރު ވާހަކައެއް ކަމަށް ބުނާކަށް ނޫން,"

އަދި ފަހުން ވިދާޅުވީ އޮޅޭގޮތަށް އެ ވާހަކަ ބުނެވިފައިވާތީ އަދި ނެގުނު މިސާލު ރަނގަޅު ނޫން ކަމަށް ވާތީ މާފަށް އެދޭ ކަމަށެވެ.

"މާތްﷲ ދެނެވޮޑިގެންވާނެ އަޅުގަނޑު ދީނަށް ފުރައްސާރަ ކުރުމުގެ ނިޔަތުގައި ބުނި އެއްޗެއް ނޫންކަން އަދި އަޅުގަނޑަކީ ދީނަށް ފުރައްސާރަ ކުރާ މީހެއް ވެސް ނޫންކަން. އެކަލާންގެ އެއީ އިންސާނުންގެ ހިތުގައިވާ ހުރިހާ ކަމެއް ވެސް ދެނެވޮޑިގެންވާ އިލާހު," ދިފާއުގައި ނެރުނު ބަޔާނުގައި ރޮޒައިނާ ވިދާޅުވި އެވެ.

ރޮޒައިނާ މިހެން ވިދާޅުވި ނަމަވެސް އޭނާ ދެއްކި ވާހަކަތަކުގައި މިސާލެއްގެ ގޮތުން ހޫރައްލީނުންގެ ވާހަކަ ގެންނަން ޖެހޭ އެއްވެސް ސަބަބެއް ނެތެވެ. އަދި ހޫރައްލީނުންގެ ވާހަކަ އަކީ ބޭކާރު ވާހަކައެއް ކަމަށް އޮޅިގެން ދެންނެވޭނެ ހާލަތެއް ވެސް ނެތެވެ. ފަތުވާ ކޮމެޓީން މި ފަހުން އެފަދަ އެއްވެސް ފަތުވާއެއް ވެސް ދީފައެއް ނުވެ އެވެ.