ރާއްޖޭގެ މޫސުން އަނެއްކާވެސް ގޯސްވެ އުތުރާއި މެދު ރާއްޖެތެރެއަށް ރީނދޫ ސަމާލު ނެރެފި އެވެ.

މޫސުމާ ބެހޭ ގައުމީ އިދާރާ، މެޓް އޮފީހުން ރީނދޫ ސަމާލު ނެރެފައިވަނީ ހއ. އަތޮޅުން ފެށިގެން ވ. އަތޮޅާ ހަމައަށެވެ.

އެ ސަރަހައްދަށް ރީނދޫ ސަމާލު ނެރެފައިވަނީ ހެނދުނު 9:30 އިން މެންދުރު 1:30 އާ ހަމައަށެވެ.

Advertisement

މެޓް އޮފީހުން ބުނީ އެވަގުތު ތަކުގައި އެ ސަރަހައްދަށް ބޯކޮށްވާރޭ ވެހި ގުގުރުން އެކަށީގެންވާ ކަމަށެވެ.

މެޓް އޮފީހުން މިއަދުގެ މޫސުން ލަފާކޮށް ބުނެފައިވާ ގޮތުގައި، މެދު ރާއްޖެ ތެރެއާއި އުތުރަށް ވިއްސާރަ ކުރާނެއެވެ. އަދި ބައެއް ރަށްތަކަށް ބޯކޮށްވާރޭވެހި ގުގުރާނެ ކަމަށް ލަފާކުރާއިރު ދެކުނުގެ އެކި ރަށްތަކަށްވެސް ކެރީގެ އަސަރު ކުރާނެއެވެ. 

މެޓް އޮފޯހުން ލަފާކުރާ ގޮތުގައި ރާއްޖޭގެ މެދުރާއްޖެ ތެރެއާއި އުތުރަށް އިރުއުތުރާއި އިރުން ގަޑިއަކު އަށް މޭލާއި 18 މޭލާ ދެމެދުގެ ބާރުމިނުގައި ވައި ޖެހޭނެ އެވެ.

އެހެން ސަރަހައްދުތަކަށް ހުޅަނގާއި އުތުރުން ގަޑިއަކު 3 މޭލާއި 10 މޭލާ ދެމެދުގެ ބާރުމިނުގައި ވައިޖެހޭނެ ކަމަށްވެސް ލަފާކޮށްފައިވެ އެވެ. އަދި ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައި ގަދަވާނެ ކަމަށް ބެލެވޭ ކަމަށްވެސް ލަފާކޮށްފައުވެއެވެ.

މީގެ އިތުުރުން ދެކުނުގެ އަތޮޅުތަކަށް ކަނޑު މަޑުވާނެ ކަމަށް މެޓްއޮފީހުން ލަފާކުރާއިރު، އުތުރާއި މެދުރާއްޖެ ތެރެއަށް އާދައިގެ ވަރަކަށް ކަނޑު ގަދަވާނެ ކަމަށްވެސް ލަފާކުރެއެވެ. އެހެންކަމުން އުތުރާއި މެދުރާއްޖެތެރޭގައި ދަތުރުފަތުރު ކުރާ ފަރާތްތަކުން މޫސުމަށް ސަމާލުވުމަށް އެދިފައުވެއެވެ.