މާލެ ސިޓީ ކައުންސިލްގެ މާފަންނު މެދު ދާއިރާގެ ކައުންސިލް މެންބަރުކަމުންނާއި، މާލެ ސިޓީ ޑެޕިިއުޓީ މޭޔަރު ކަމުގެ މަގާމުން އަހުމަދު ނަރީޝް އިސްތިއުފާ ދެއްވައިފިއެވެ. 

އެކަން އިއުލާންކޮށް އޭނާ އެކްސްގައި ކުރެއްވި ޕޯސްޓެއްގައި ވިދާޅުވީ، މަގާމުން އިސްތިއުފާ ދެއްވީ، ގައުމާއި ރައްޔިތުންނަށް އެހެން ހައިސިއްޔަތަކުން ހިދުމަތްކުރަން ފުރުސަތު ލިބުމާއި ގުޅިގެން ކަމަށެވެ.

އިސްތިއުފާ ދެއްވިކަން އިއުލާން ކުރައްވައި ނަރީޝް ކުރެއްވި ޕޯސްޓުގައި އޭނާ ވަނީ އިސްތިއުފާގެ ސިޓީވެސް ހިއްސާ ކުރައްވާފައެވެ. 

Advertisement

އެސިޓީގައި އޭނާ ވަނީ މާލެސިޓީގެ މެންބަރު ކަމަށް އޭނާ އައްޔަނު ކުރެއްވި ކަމަށްޓަކައި ދާއިރާގެ އެންމެހާ ރައްޔިތުންނަށް ޝުކުރު އަދާކުރައްވާފައެވެ. އަދި ކެންޕެއިންގެ ތެރެއިން އެހީވެދިން މީހުންނަށާއި، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ފަރާތުން އޭރުވެސް ލިބިލެއްވި އެހީތެރިކަމަށް ޝުކުރު ދަންނަވާފައިވެއެވެ. 

މީގެ އިތުރުން، ރައީސުލްޖުމްހޫރިއްޔާ އަށާއި، މާލެ ސިޓީ ކައުންސިލްގެ މިހާރުގެ މޭޔަރ އާދަމް އާޒިމް އަށާއި އެހެން މެންބަރުންނަށާއި މުބައްޒަފުންނަށްވެސް ޝުކުރު އަދާކުރެއްވިއެވެ.