ސަރުކާރު ހިންގާ މައި ޕާޓީ -- ޕީޕަލްސް ނެޝަނަލް ކޮންގްރެސްގެ ހިންގުމުން އެ ޕާޓީގެ ޗެއާޕާސަން އަބްދުއްރަހީމް އަބްދުﷲ ދުރުކޮށްފި އެވެ.

ޕީއެންސީ ހިންގުމުން އަބްދުއްރަހީމް ދުރުކޮށްފައިވާކަން ޕާޓީގެ ލީޑާޝިޕްގެ ހުރިހާ ބޭފުޅުންނަށް މިހާރު ވަނީ އަންގާފަ އެވެ. އަދި މީގެ ފަހުން ޕާޓީ ހިންގުމުގެ ޒިންމާއާ ހަވާލުވެވަޑައިގެން ހުންނަވާތީ ޕީޖީ ލީޑަރު އިބްރާހިމް ފަލާހު ކަމަށް ވަނީ އަންގާފަ އެވެ.

އަދި ޕާޓީގެ އިދާރީ އިސް ބޭފުޅުންނަށްވެސް މިހާރު ވަނީ އެކަން އަންގާފަ އެވެ. މިފަދަ ބަދަލެއް ގެންނެވި ސަބަބެއް ސާފެއް ނުވެ އެވެ.

ނަމަވެސް ރައީސް މުއިއްޒުއާ އަބްދުއްރަހީމްގެ ގުޅުން ގޯސްވެފައިވާ ކަމަށް އަޑުފެތުރިފައިވާތާ ވަރަށް ގިނަ ދުވަސްވެއްޖެ އެވެ. އަދި ޕީއެންސީގެ ހިންގުމުގައި އަބްދުއްރަހީމްގެ ދައުރެއް ނެތް ކަމަށް ވާހަކަ ދެކެވޭތާ ވެސް ދުވަސްތަކެއް ވަނީ ވެފަ އެވެ.

ރޭ އޮތް ތަރާވީހުގައި ރައީސްގެ އަރިހުގައި އަބްދުއްރަހީމް

ޕީއެންސީގެ ރައީސްގެ މަގާމުގައި ކުރީން ހުންނެވީ އަބްދުއްރަހީމެވެ. ޕީއެންސީ އަކީ ޕީޕީއެމް އުވާލާފާނެ ކަމުގެ ބިރަށް ނުވަތަ ރައީސް ޔާމީންގެ އަތްޕުޅުން ޕީޕީއެމް ބީވެެދާނެ ކަމުގެ ބިރު ހީވުމުން އުފެއްދެވި ޕާޓީ އެކެވެ. ނަމަވެސް ޕީޕީއެމް ގެއްލުމުގެ ބިރު ފިލާ ދިއުމުން ޕީއެންސީ ކުޑަ ޕާޓީއެއްގެ ގޮތުގައި ބޭއްވީވި އެވެ.

ޕީއެންސީ ބޮޑު ޕާޓީއަކަށް ބަދަލު ކުރެއްވީ ރައީސް މުއިއްޒު ވެރިކަމަށް ވަޑައިގަތުމަށް ފަހު އެވެ. އަދި އަސާސީ ގަވާއިދަށް ބަދަލު ގެންނަވާ ޕާޓީގެ ޗެއާޕާސަންގެ މަގާމު އުފެއްދެވި އެވެ. އެ މަގާމު އަބްދުއްރަހީމަށް ދެއްވާ ރައީސަކަށް ވަޑައިގަތީ ރައީސް މުއިއްޒެވެ. 

އަދި ފަހުން އަސާސީ ގަވާއިދަށް ބަދަލު ގެނެސް ޕާޓީގެ ޗެއާޕާސަންގެ މަގާމަކީ ރައީސް ހަމަޖައްސަވާ މަގާމަކަށް ވަނީ ބަދަލު ކުރައްވާފަ އެވެ.

އަބްދުއްރަހީމާއި ގުޅުން ގޯސްވެފައިވާ ކަމަށް އަޑުފެތުރު ފަހުން ޓޫރިޒަމް މިނިސްޓަރު ކަމުގައި ހުންނެވި އަބްދުއްރަހީމްގެ ދޮށީ ފިރިހެން ދަރިކަލުން ފައިސަލް އިބްރާހިމް ވަނީ މަގާމުން ވަކިކުރައްވާފަ އެވެ. އަދި ސަރުކާރުގައި ތިއްބެވި އަބްދުއްރަހީމްއާ ގުޅުން އޮތް ގިނަ ބޭފުޅުންތަކެއް މިހާރު ވަނީ މަގާމުން ވަކި ކުރައްވާފަ އެވެ.