އިންޑިއާ އަދި ޗައިނާ ސަރުކާރުން މަތީތައުލީމް ހާސިލްކުރުމަށް ރާއްޖެއަށް ދީފައިވާ ސްކޯލާޝިޕްތަކަށް ކުރިމަތިލުމުގެ ފުރުސަތު ހަޔަރ އެޑިއުކޭޝަނުން ހުޅުވާލައިފިއެވެ.

ހަޔަރ އެޑިއުކެޝަނުން ހުޅުވާލި މި ފުރުސަތުގެ ތެރޭގައި ހިމެނެނީ، ކުރިއަށްއޮތް ދިރާސީ އަހަރު ޑރ. އޭ.ޕީ.ޖީ އަބްދުލް ކަލާމް ކޮމަންވެލްތު ސްކޮލަޝިޕްސްކީމްގެ 4 ފުރުޞަތަކާއި، އަތަލް ބިހާރީ ވަޖްޕާޔީ ޖެނެރަލް ސްކޮލަޝިޕް ސްކީމް ގެ 10 ފުރުޞަތެކެވެ. އެގޮތުން ޑރ.އޭޕީޖީ އަބްދުލް ކަލާމުގެ ކޮމަންވެލްތު ސްކޮލަރޝިޕްގެ ދަށުން ބެޗްލަރސް ޑިގްރީ، މާސްޓަރސް ޑިގްރީ އަދި ޕީ.އެޗް.ޑީ ގެ ޕްރޮގްރާމްތަކަށް އެޕްލިކޭޝަން ހުށަހެޅޭނޭކަމަށް ހަޔަރ އެޑިއުކޭޝަނުން ބުނެއެވެ.

އަދި އަތަލް ބިހާރީ ވަޖްޕާޔީ ޖެނެރަލް ސްކޮލަޝިޕްގެ ދަށުން ބެޗްލަރސް ޑިގްރީ، މާސްޓަރސް ޑިގްރީ އަދި ޕީ.އެޗް.ޑީ ގެ ޕްރޮގްރާމްތަކަށް އެޕްލިކޭޝަން ހުށަހެޅޭނޭކަމަށް ހަޔަރ އެޑިއުކެޗަނުން ބުނެއެވެ. މިސްކޮލަރޝިޕަށް ކެންޑިޑޭޓުން ހޮވުމުގެ ހުރިހާ މަސައްކަތެއް ކުރާނީ ސްކޮލަރޝިޕް ދޭ ފަރާތުންނެވެ.

ޗައިނީޒް ސްކޮލަރޝިޕް ކައުންސިލް އިން ހިންގުމަށް ހަމަޖެހިފައިވާ "ޔޫތް އޮފް އެކްސެލެންސް ސްކީމް އޮފް ޗައިނާ ޕްރޮގްރާމްގެ ދަށުން ހުޅުވާލާފައިވަނީ، ޗައިނާގައި ހިންގާ މާސްޓަރސް ޑިގްރީ ޕްރޮގްރާމްތަކުގައި ބައިވެރިވުމުގެ ފުރުޞަތެވެ. މި ސްކޮލަރޝިޕަށް ޝައުގުވެރިވާ ފަރާތްތަކުން މިމަހުގެ 30 ވަނަ ދުވަހުގެ ކުރިން ސީ.އެސް.ސީގެ ޗައިނީޒް ގަވަރންމަންޓް ސްކޮލަރޝިޕް ސިސްޓަމް މެދުވެރިކޮށް އޮންލައިނުކޮށް އެޕްލިކޭޝަން ހުށަހަޅަން ޖެހެއެވެ.

ހަޔަރ އެޑިއުކެޝަނުން ބުނީ ކޯސްތަކަށް ހޮވޭ ފަރާތްތަކުން، ކޯހަށް ފުރުމުގެ ކުރިން ކޯސް ހިންގާ އިންސްޓިޓިއުޓަކީ މޯލްޑިވްސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ޤަބޫލުކުރާ އިންސްޓިޓިއުޓެއްތޯއާއި، ހޮވިފައިވާ ކޯހަކީ އެމްކިޔުއޭ އިން ޤަބޫލުކުރާ ކޯހެއްތޯ ކަށަވަރުކުރަން އެދޭކަމަށެވެ.