މާލެ ސިޓީ ކައުންސިލްގެ ޑެޕިއުޓީ މޭޔަރުގެ މަގާމަށް މާފަންނު ހުޅަނގު އުތުރު ދާއިރާގެ ކައުންސިލް މެންބަރު މުހައްމަދު އަރީޝް އިންތިހާބު ކޮށްފި އެވެ.
ކައުންސިލްގެ މިއަދުގެ އާންމު ޖަލްސާގައި ޑެޕިއުޓީ މޭޔަރު ކަމަށް ޝައުގުވެރިކަން ފާޅުކުރެއްވުމަށް މޭޔަރު އާދަމް އާޒިމް ހުޅުވާލެއްވުމުން، ނަން ހުށަހެޅުއްވީ އަރީޝް އެކަންޏެވެ.
އެހެންކަމުން، އަރީޝް އެ މަގާމަށއ އިންތިޚާބު ކުރުމަށް ފެންނަ ނުފެންނަ ސިއްރު ވޯޓެއް ނަގާފައިވާއިރު، ވޯޓުގައި ބައިވެރިވެވަޑައިގަތް 16 ކައުންސިލް މެންބަރުން ވެސް ވޯޓު ދެއްވީ އަރީޝް ޑެޕިއުޓީ މޭޔަރުގެ މަގާމަށް އައްޔަނު ކުރަން ފެންނަ ކަމަށެވެ.
މާލޭގެ ޑެޕިއުޓީ މޭޔަރުގެ މަގާމު ހުސްވީ، އެމަގާމުގައި ކުރިން ހުންނެވި އަހުމަދު ނަރީޝް މިދިޔަ ބުދަ ދުވަހު އިސްތިއުފާ ދެއްވުމުންނެވެ.
ނަރީޝްގެ އިސްތިއުފާ އިއުލާންކޮށް އޭނާ އެކްސްގައި ކުރެއްވި ޕޯސްޓެއްގައި ވިދާޅުވީ، މަގާމުން އިސްތިއުފާ ދެއްވީ، ގައުމާއި ރައްޔިތުންނަށް އެހެން ހައިސިއްޔަތަކުން ހިދުމަތްކުރަން ފުރުސަތު ލިބުމާއި ގުޅިގެން ކަމަށެވެ.
ނަރީޝްގެ އިސްތިއުފާ ސިޓީގައި އޭނާ ވަނީ މާލެސިޓީގެ މެންބަރު ކަމަށް އޭނާ އައްޔަނު ކުރެއްވި ކަމަށްޓަކައި ދާއިރާގެ އެންމެހާ ރައްޔިތުންނަށް ޝުކުރު އަދާކުރައްވާފައެވެ. އަދި ކެންޕެއިންގެ ތެރެއިން އެހީވެދިން މީހުންނަށާއި، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ފަރާތުން އޭރުވެސް ލިބިލެއްވި އެހީތެރިކަމަށް ޝުކުރު ދަންނަވާފައިވެއެވެ.
މީގެ އިތުރުން، ރައީސުލްޖުމްހޫރިއްޔާ އަށާއި، މާލެ ސިޓީ ކައުންސިލްގެ މިހާރުގެ މޭޔަރ އާދަމް އާޒިމް އަށާއި އެހެން މެންބަރުންނަށާއި މުބައްޒަފުންނަށްވެސް ޝުކުރު އަދާކުރެއްވިއެވެ.
Advertisement
This content is created and paid for by advertisers and does not involve Voice Journalists
