މިއަހަރުގެ ފުރަތަމަ 10 ހަފްތާ ނިމިގެންދިޔައިރު، ދައުލަތުގެ އާމްދަނީ އާ އަޅާބަލާއިރު ކުރެވުނު ހަރަދުތައް ނިސްބަތުން ކުޑަކުރެވިފައިވާކަމަށް މާލީ ވުޒާރާގެ ތަފާސްހިސާބުތަކުން ދައްކައިފިއެވެ.

މާލީވުޒާރާއިން ނެރެ އާއްމުކޮށްފައިވާ ދައުލަތުގެ އެންމެފަހުގެ ހަރަދު ބަރަދު ތަފްސީލަށް ބަލާއިރު، މިހިނގާ މާރޗްމަހުގެ ނިޔަލަށް ހަރަދުގެ ގޮތުގައި ހިނގާފައިވަނީ، 6.5 ބިލިއަން ރުފިޔާއެވެ. މިދިޔަ އަހަރު މިއަދަދު ހުރީ 7.8 ބިލިއަން ރުފިޔާގައެވެ. މިއަހަރުގެ މިހާތަނަށް ރިކަރަންޓް ހަރަދުގެ ގޮތުގައި6.1 ބިލިއަން ރުފިޔާ ހެދަކުރެވުނުއިރު، މިދިޔަ އަހަރުގެ މި މުއްދަތުގެ ތެރޭގައި ރިކަރަންޓް ހަރަދުތައް ހުރީ 6.2 ބިލިއަން ރުފިޔާގައެވެ. 

މާލީ ވުޒާރާއިން ނެރެފައިވާ ދައުލަތުގެ ހަރަދުތައް ހިނގިގޮތުގެ ހިސާބުތަކަށް ބަލާއިރު، އަހަރުގެ މިހާތަނަށް އެންމެ ބޮޑު ހޭދައެއް ކޮށްފައިވަނީ ލޯނުތައް އަނބުރާ ދެއްކުމަށެވެ. މިގޮތުން ލޯނުތައް ދެއްކުމަށް 2.3 ބިލިއަނަށްވުރެ ގިނަ ރުފިޔާ ވަނީ ހޭދަކޮށްފައެވެ.

ރިޕޯޓަށް ބަލާއިރު އަހަރުގެ މިހާތަށް ޓެކްސް އާއި ހިލޭ އެހީގެ ގޮތުގައި ދައުލަތަށް އާމްދަނީގެ ގޮތުގައި 7.8 ބިލިއަން ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގެ ތެރޭގައި ލިބިފައިވަނީ، 7.4 ބިލިއަން ރުފިޔާއެވެ. އަހަރުގެ މިހާތަނަށް ޓެކްހުން އާމްދަނީގެ ގޮތުގައި 6.3 ބިލިއަން ރުފިޔާ ލިބުނުއިރު، ޓެކްސްނޫން އާމްދަނީގެ ގޮތުގައި 1.5 ބިލިއަން ރުފިޔާ ވަނީ ލިބިފައެވެ. ޓެކުހުގެ ގޮތުގައި އެންމެ ގިނައިން އާމްދަނީ ލިބުނީ ޓޫރިޒަމް ޖީއެސްޓީ، އާއްމު ޖީއެސްޓީގެ އިތުރުން ބިޒްނަސް ޕްރޮޕަޓީ ޓެކުހުންނެވެ.

މިހިނގާ 2025 ވަނަ އަހަރަށް ރައްޔިތުންގެ މަޖިލީހުން ފާސްކޮށްފައިވަނީ 56.6 ބިލިއަން ރުފިޔާގެ ބަޖެޓެކެވެ. މި އަހަރުގެ ބަޖެޓުގެ ޖުމުލަ ޚަރަދަކީ 49.2 ބިލިއަން ރުފިޔާއެވެ. އެއީ، ރިކަރަންޓް ޚަރަދުގެ ގޮތުގައި 35.9 ބިލިއަން ރުފިޔާއާއި ކެޕިޓަލް ޚަރަދުގެ ގޮތުގައި 13.3 ބިލިއަން ރުފިޔާއެވެ. މި އަހަރުގެ ޖުމުލަ އާމްދަނީއާއި ހިލޭ އެހީ 39.8 ބިލިއަން ރުފިޔާއަށް އަރާނެ ކަމަށްވަނީ އަންދާޒާކޮށްފައެވެ. އެއީ، ހިލޭ އެހީގެ ގޮތުގައި 2.5 ބިލިއަން ރުފިޔާ ހިމަނައިގެންނެވެ. ދަރަނި އަނބުރާ ދައްކަން ބަޖެޓުގައި 3.9 ބިލިއަން ރުފިޔާ ވަނީ ހިމަނާފައެވެ.