ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމުން ދިވެހީން މިންޖުވާން ޖެހޭ ކަމަށް ވިދާޅުވެ އަދާލަތު ޕާޓީގެ ރައީސް އަދި ކުރީގެ ހޯމް މިނިސްޓަރު އިމްރާން އަބްދުﷲ ދެއްކެވި ވާހަކަތަކަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ރައްދު ދެއްވައިފި އެވެ.
މިވަގުތު ތައިލެންޑް ގައި ދިރިއުޅެމުންދާ އިމްރާން ވަނީ އެކްސްގައި ޕޯސްޓެއް ކުރައްވާ ރައީސް މުއިއްޒަށް ފާޑު ވިދާޅުވެފަ އެވެ. އޭނާ ވިދާޅުވީ ރައީސް މުއިއްޒު ވެރިކަމުގައި ހުންނަވާ ކޮންމެ ދުވަހަކީ މުޅި ދިވެހި ދައުލަތާއި ދިވެހި ރައްޔިތުންނަށް އެތައް ގެއްލުމެއްވާ ދުވަހެއް ކަމަށެވެ. އަދި ވިދާޅުވީ މިކަމުން ދިވެހިން މިންޖުވާން އެބަ ޖެހޭ ކަމަށެވެ.
އިމްރާންގެ އެ ވާހަކަތަކަށް ރައްދު ދެއްވާ މިނިސްޓަރު ޝަހީމް ވިދާޅުވީ އެއްޗެެއް ގޯސްކަން ދައްކަން މަސައްކަތް ކުރަންވާނީ، އެއަށް ވުރެ ރަނގަޅު އެއްޗެއް ދައްކާފައި ކަމަށެވެ.
އަދި ވިދާޅުވީ މީހަކަށް، މުންކަރާތެއް ކަމަށް ގަބޫލުކުރެވޭ ކަމެއް އެހެން މުންކަރާތަކުން ނެތިކޮށްލުމަށް މަސައްކަތް ކުރުމަކީ، ޝަރުއީ އުސޫލާ ހިލާފްކަމެއް ކަމަށެވެ.
އިމްރާނަކީ ދިވެހި ސިޔާސީ މައިދާނުގައި ރައްޔިތުންގެ އެންމެ އިތުބާރު ކުޑަ ލީޑަރެވެ. އެކި ފަހަރު އެކި ލީޑަރުންނާއި ޕާޓީތަކަށް އަމާޒު ކުރައްވާ އޭނާ ދައްކަވާ ވާހަކަތަކުގެ ސަބަބުން ރައްޔިތުންގެ އިތުބާރާއި ތާއީދު ވަނީ ވަރަށް ބޮޑަށް ގެއްލިފަ އެވެ.
Advertisement
This content is created and paid for by advertisers and does not involve Voice Journalists
