ކޮންސްޓްރަކްޝަން މިނިސްޓްރީން އެކަނިވެސް 40 ބިލިއަން ރުފިޔާގެ މަޝްރޫއު ހިންގަން އެކި ފަރާތްތަކާ އެކު ސޮއިކޮށްފައިވުމާއެކު މި ކަމުގައި ހުރި ދަތިތައް ރައްޔިތުން ގަބޫލު ކުރުމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އިއްޔެ އެދިވަޑައިގެންފި އެވެ.
ވަޒީރު މުއްޠަލިބް މިހެން ވިދާޅުވީ، ގދ. ފިޔޯރީގެ ބަނދަރު އަލުން ތަރައްގީ ކުރުމުގެ މަސައްކަތް އެމްޓީސީސީއާ ހަވާލު ކުރުމަށް އެ ރަށުގައި ބޭއްވި ރަސްމިއްޔާތުގައި ވާހަަކަފުޅު ދައްކަވަމުންނެވެ.
ދައުލަތުގެ ރިކަރަންޓު ހަރަދަށް މިހާރު ވެސް 40 މިލިއަނެއްހާ ރުފިޔާ ހޭދަވާ ކަން ފާހަަކުރައްވަމުން ވަޒީރު ވިދާޅުވީ، އެހެންކަމުން ލިބޭ އާމްދަނީ އަށް ވުރެ ހަރަދު ބޮޑުވުމުން އަބަދުވެސް ޖެހެނީ ތަރައްގީގެ މަޝްރޫއުތަކަށް ލޯނު ނަގަން ކަމަށެވެ.
އެހެންވެ، ހުރިހާ ރަށެއްގައި އެތައް ބިލިއަން ރުފިޔާގެ މަޝްރޫއު ހިންގުމަކީ ރާއްޖެ ފަދަ ގައުމަކަށް އޮތް ވަރަށް ބޮޑު ގޮންޖެހުމެއް ކަމަށާއި ދުނިޔޭގެ މަސްރަހަށް އަންނަ ބަދަލުތަކާއި ބޮޑެތި ގައުމުތަކުގެ މެދުގައި ޖެހޭ މައްސަލަތަކުގެ ސަބަބުން ލޯނު ނެގުމުގައި ރާއްޖެ އަށް ދަތިތައް ކުރިމަތިވާ ކަމަށް ވަޒީރު ވިދާޅުވި އެވެ.
އެ ކަންތައް ރައްޔިތުން ގަބޫލު ކުރުމަކީ އަޅުގަނޑު ވަރަށް ބޮޑަށް އެދޭ ކަމެއް. ހަގީގަތުގައި އަޅުގަނޑުމެން މަޝްރޫއެއް ހިންގަން ބޭނުންވާއިރު، ގޮސްފައި ބޭނުން ވަގުތަކު ލޯނު ނަގައިގެން އައިސް ކުރެވޭ ކަހަލަ ގޮތަކަށް ނޫން މި އޮންނަނީ. އަޅުގަނޑުމެންގެ އެތެރެއިން އެ ވަރަަކަށް ލޯނެއް ނުލިބޭ،
ވަޒީރު
އިތުރަށް ވަޒީރު ވިދާޅުވީ، ސަރުކާރުން މަޝްރޫއުތައް ހިންގަން ޖެހެނީ ދުރާލާ ރާވައިގެން ވަރަށް ގިނަ ފަރާތްތަކަކާ ގުޅިގެން ކަމަށެވެ. އެކަމަކު، އެއީ ރައްޔިތުންނަށް ފެންނާނެ ކަމެއް ނޫން ކަަމުގައި ވަޒީރު ސިފަކުރެއްވިއެވެ.
ގދ. ފިޔޯރީގެ ބަނދަރު އަލުން ތަރައްގީ ކުރުމުގެ މަސައްކަތް އެމްޓީސީސީއާ ހަވާލު ކުރުމުގެ ރަސްމިއްޔާތުގެ ތެރެއިން. ފޮޓޯ: ކޮންސްޓްރަކްޝަން މިނިސްޓްރީ
ހަމައެކަނި ކޮންސްޓްރަކްޝަން މިނިސްޓްރީގެ ތެރެއިން ވެސް 40 ބިލިއަން ރުފިޔާގެ މަޝްރޫއުގައި މިހާރު ވެސް ސޮއިކުރެވިފައި އެބަހުރި. މި ދެންނެވީ އަޅުގަނޑުމެންނަށް އަހަރެއްގެ މައްޗަށް ލިބޭ އާމްދަނީ އަށް ވުރެ އިތުރަށް މަޝްރޫއުތަކުގެ އަދަދު ހަމައެކަނި [ކޮންސްޓްރަކްޝަން] މިނިސްޓްރީގައި އެބަހުރި. ކުރަމުން އެބަދޭ. އެކަން ކުރާ ނަމަ އެކަން ކުރެވޭނީ އެ ސަރުކާރެއްގެ ތެރެއިން ވަަރަށް ގިނަ މަސައްކަތްތަކެއް ކުރެވިގެން. ރައްޔިތުންނަށް ފެންނާނީ މަޝްރޫއުތައް ކުރިއަށް ދާ ތަން. އެހެން ނަމަވެސް އެ މަޝްރޫއުތައް އެ ހިސާބަށް އަންނަނީ ހަގީގަތުގައި ވަރަށް ގިނަ މަސައްކަތްތަކެއް ކުރެވިގެން. ދޭދޭ ގައުމުތަކުގެ މެދުގައި ވަރަށް ގިނަ ވާހަކަތަކެއް ދެއްކެވިގެން.
ވަޒީރު
އުފަން ރަށް ފިޔޯރީގައި ވާހަކަ ދައްކަވަމުން މުއްތަލިބު ވިދާޅުވީ، އެ ހުރިހާ ކަމެއް އެހެން ހުރުމުން ރައްޔިތުންގެ ފުރިހަމަ އެއްބާރުލުން ސަރުކާރަށް ދިނުމަށެވެ. އަދި ސަރުކާރަށް ކުރިމަތިވާ ގޮންޖެހުންތައް ގަބޫލު ކުރުމަށްވެސް ވަޒީރު އެދިވަޑައިގގަތެވެ.
ރާއްޖޭގެ ތަރައްގީ އަށް ބޭނުންވާ 550 އަށް ވުރެ ގިނަ މަޝްރޫއުތަކެއް ހިންގަން މި ފަހުން ސޮއިކޮށްފައިވާ ކަމަށާއި އޭގެ ތެރޭގައި ކުރިން ހުއްޓިފައިވާ މަޝްރޫއުތަކާއި އަލަށް ފަށާ މަޝްރޫއުތައް ހިމެނޭ ކަމަށް ރައީސުލްޖުމްހުރިއްޔާ ޑރ. މުޙައްމަދު މުޢިއްޒު މިދިޔަ މަހުގައި ވިދާޅުވެފައެވެ. އެމަނިކުފާނު ވިދާޅުވި ގޮތުގައި، މި އަހަރު ނިމެންވާއިރަށް ގިނަ މަޝްރޫޢުތަކެއް ނިމިގެންދާނެއެވެ.
Advertisement
This content is created and paid for by advertisers and does not involve Voice Journalists
