ހަންގޭރީގައި އެއް ޖިންސުން ގުޅުން ހިންގުން ޕްރޮމޯޓްކުރާ ހަރަކާތްތައް މަނާކުރުމަށް ޤާނޫނުއަސާސީއަށް ގެނައި އިސްލާހު އެގައުމުގެ މަޖިލީހުން ފާސްކޮށްފިއެވެ.

މި އިސްލާހު ފާސްކުރުމަށް ބޭނުންވާ ތިންބައިކުޅަ ދެބައިގެ އަޣުލަބިއްޔަތު ލިބުނީ ވެރިކަންކުރާ ފިޑެޒް-ކޭޑީއެންޕީ ކޯލިޝަނުގެ މެންބަރުންގެ ވޯޓުންނެވެ. މި އިސްލާހު ހުށަހެޅީ ބޮޑުވަޒީރު ވިކްޓަރ އޯބާންގެ ސަރުކާރުންނެވެ.

މި އިސްލާހުގެ ސަބަބުން އެއްޖިންސުން ގުޅުން ހިންގުމުގެ ހަރަކާތްތައް މަނާކުރުމުގެ ބާރު ޤާނޫނުއަސާސީން ލިބިދޭއިރު، މީގެ ތެރޭގައި ކޮންމެ އަހަރަކު ބުޑަޕެސްޓުގައި ބާއްވާ ޕްރައިޑް ހަރަކާތްވެސް ހިމެނެއެވެ.

މި އިސްލާހުގައި ބަޔާންކޮށްފައިވަނީ ޖިންސު ކަމުގައި ބަލާނީ ފިރިހެން އަދި އަންހެން މި ދެ ޖިންސު ކަމަށެވެ. މީގެ ސަބަބުން ޓްރާންސްޖެންޑަރ މީހުން ކަމަށް ވެގެން އުޅޭ މީހުންގެވެސް ބަލާނީ އެމީހުން އުފެދުމުގައި ހުރި ޖިންސަށެވެ. 

ހަންގޭރީ ސަރުކާރުން ބުނީ، މި އިސްލާހަކީ އަމިއްލަ ޝަޚްސިއްޔަތަށް ހުރަސްއެޅުމެއް ނޫން ކަމަށާއި، ޤާނޫނީ މިންގަނޑުތައް ބިނާވެފައިވަނީ ބަޔޮލޮޖިކަލް ހަޤީޤަތްތަކުގެ މައްޗަށް ކަން އޮޅުންފިލުވައިދިނުމަށް ކަމަށެވެ.

މި އިސްލާހާ ދެކޮޅަށް އިދިކޮޅު ފަރާތްތަކުން އިހުތިޖާޖުކޮށް، މަޖިލީހުގެ ކާރު ޕާކިންގ ސަރަހައްދު ބަންދުކުރަންވެސް މަސައްކަތްކުރިއެވެ. ނަމަވެސް ފުލުހުން ވަނީ އިހުތިޖާޖުކުރި ފަރާތްތައް އެ ސަރަހައްދުން ނެރެފައެވެ.

ހަންގޭރީ ސަރުކާރުން ބުނާ ގޮތުގައި ކުޑަކުދިން ހިމާޔަތްކުރުމުގެ ސިޔާސަތުތަކުގެ ދަށުން ކުޑަކުދިންިންނަށް ހޯމޯސެކްޝުއަލިޓީއާ ގުޅޭ އެއްވެސް މަޢުލޫމާތެއް ލިބުން މަނާކުރުމަކީ "ވޯކް އައިޑިއޮލޮޖީ" އަދި "ޖެންޑަރ މެޑްނެސް" އިން ކުޑަކުދިން ސަލާމަތްކުރުމަށް ކޮންމެހެން ބޭނުންވާ ކަމެކެވެ.

މި އިސްލާހުގެ ސަބަބުން ހަންގޭރީ ސަރުކާރުން އެއްޖިންސުން ގުޅުން ހިންގުމާއި ދެކޮޅަށް ކުރަމުންދާ މަސައްކަތަށް ބޮޑު އެއްބާރުލުމެއް ލިބިގެންދާނެއެވެ.