ކުޅުދުއްފުށީ ސިޓީ ކައިރިއަށް މަސްހިފަން އުޅެނިކޮށް މިޔަރެއް ހަމަލާދީ ޒަހަމްކޮށްލައިފިއެވެ.

ވޮއިސްއާ މައުލޫމާތު ހިއްސާކުރި އެރަށު މީހަކު ބުނީ، އެމީހާއަށް މިޔަރު ހަމަލާދީފައިވަނީ، މިއަދު ހެނދުނު މަސްހިފަން ފައިބައިގެން  އުޅެނިކޮށްކަމަށެވެ. މިއަދު ހެނދުނު 7 ޖަހާކަންހާއިރު ހިނގި އެހާދިސާގައި އަނިޔާވެފައިވަނީ 30 އަހަރުގެ ފިރިހެނަކަށެވެ. އެމީހުން މަސްހިފަން ފޭބީ ކުޅުދުއްފުށި ކޮނިކޮށްޓާދިމާލު ބޭރަށްކަމަށްވެސް އޭނާ ބުންޏެވެ. 

މިޔަރުގެ ހަމަލާދިންމީހާގެ ކަނާތު ކޮނޑުކަށިގަނޑާ ދިމާލުން ވަރަށްބޮޑަށް ޒަހަމްވެފައިވާކަމަށާާއި، ކުޅުދުއްފުށި ހޮސްޕިޓަލުން ފަރުވާދިނުމަށްފަހު އޭނާ މާލެ ގެންދިއުމުގެ މަސައްކަތް ފަށާފައިވާކަމަށްވެސް އެމީހާ ބުންޏެވެ.

Advertisement

" މިޔަރު އޭނާގެ ގައިގައި ހިފުމަށްފަހު ދިޔައީޯ އަޑިއަށް. މަތީގައި އޮއްވާ އައިސް ހިފީ. އޭރު އަތުގައި މަހެއްވެސް ނެތް" ކުޅުދުއްފުށިން ވާހަކަދެއްކި މީހާ ބުންޏެވެ.

މި ހާދިސާގައި އޭނާގެ ކޮނޑު ކަށިގަނޑުވަނީ ނައްޓައިގެން ގޮސްފައެވެ. ހަމަލާދިންތާ މާގިނަ އިރެއްނުވެ ކުޅުދުއްފުށީ ހޮސްޕިޓަލަށް ގެންގޮސްފައެވެ. އަދި ފަރުވާދޭން ފަށައި، ލޭމަނާ ކޮށްފައިވާކަމަށް ކުޅުދުއްފުށި ހޮސްޕިޓަލުން ވަނީ ބުނެފައެވެ.

ރާއްޖޭގައި މިޔަރުގެ އާބާދީ އިތުރުވެ، މިޔަރުގެ ފަރާތުން މަސްވެރިންނަށް ނުރައްކާތެރި ކަންކަން ކުރިމަތިވަމުން އަންނަކަމަށް ބައެއް ފަރާތްތަކުން ފާހަގަކުރެއެވެ. މިޔަރަކީ އޭގެ ޒާތުގައި ގަސްތުގައި މީހުންނަށް ހަމަލާދޭ އެއްޗެއް ނޫންކަމަށް ތަޖުރިބާކާރު ބޭފުޅުން ވިދާޅުވެއެވެ. އެގޮތުން މިޔަރުގެ އުޅުމަށް ބަދަލުތައް އަންނަނީ އިންސާނުން މިޔަރަށް ކާންދިނުން ފަދަ ކަންކަން ކުރާތީކަމަށްވެސް އެފަރާތްތަކުން ބުނެއެވެ.