ށ.އަތޮޅު މިލަންދޫގައި ހަދަމުން އަންނަ ލައިސަންސް ޓްރަކްގެ ނިންމުމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގެ އެހީތެރިކަން ދޭން ފަށައިފިއެވެ.
އާރުޑީސީން ވަނީ މިލަންދޫ ލައިސަންސް ނަގާ ސަރަހައްދުގެ ބައެއް މަސައްކަތްތައް އެކުންފުނީގެ އިޖުތިމާއީ ޒިއްމާގެ ދަށުން ކޮށްދިނުމަށް ނިންމާފައެވެ. މިކަމާ ގުޅޭގޮތުން އާރުޑީސީން ބުނީ، އެކުންފުނީގެ އިޖުތިމާއީ ޒިންމާގެ ދަށުން ށ. މިލަންދޫގައި އެއްގަމު އުޅަނދު ފަހަރު ދުއްވުމުގެ ލައިސެންސް ނެގުމަށް ހަދާ ޓްރެކްގައި ތަޅުން އެޅުމާއި ކުރެހުމުގެ މަސައްކަތް ކުރަމުންދާ ކަމަށެވެ.
މިލަންދޫގެ ލައިސަންސް ނަގާ ތަނުގެ މަސައްކަތް އާރުޑީސީން ކުރަމުން އަންނައިރު، މިލަންދޫގެ މަގުތައް ޒަމާނީ ކުރުމުގެ މަސައްކަތްވެސް ކޮށްފައިވަނީ އެކުންފުނިންނެވެ. މިލަންދޫ މަގުތައް ހެދުމުގެ މަސައްކަތުގެ ދަށުން 8 މަގެއް ވަނީ ތާރުއަޅައި ނިންމާފައެވެ. މި މަސައްކަތް އެކުންފުނިން ނިންމާފައިވަނީ މިދިޔަ އަހަރުގެ ޑިސެމްބަރުމަހުގެ ތެރޭގައެވެ.
އާރުޑީސީން ތަރައްޤީކުރި މިލަންދޫގެ މަގެއް... ފޮޓޯ: އާރުޑީސީ
މިލަންދޫ މަގުތައް ހެދުމުގެ މަޝްރޫޢުގެ ދަށުން 6.15 ކިލޯ މީޓަރުގެ ސަރަހައްދެއްގައި ވަނީ ތާރު އަޅާފައެވެ. އެ މަޝްރޫޢު ކުރިއަށްގެންދިޔައީ ބަޖެޓުން 156.4 މިލިޔަން ރުފިޔާ ޚަރަދުކޮށްގެންނެވެ.
Advertisement
This content is created and paid for by advertisers and does not involve Voice Journalists
