އެންމެ ގިނަ ޕްރޮޖެކްޓް އެއްފަހަރާ ހިނގާނީ މި އަހަރު ކަމަށާއި، 2000 އަށް ވުރެ ގިނަ ޕްރޮޖެކްޓް މި އަހަރު ކުރިޔަށްގެންދިޔުމަށް ރާވައިފައިވާ ކަމަށް ފިޝަރީސް މިނިސްޓަރ އަހުމަދު ޝިޔާމް ވިދާޅުވެއްޖެއެވެ.
ޕީޕަލްސް ނެޝަނަލް ކޮންގްރެސް (ޕީއެންސީ) އިން ރޭ ކުރިއަށް ގެންދިޔަ ޖަލްސާގައި ވާހަކަ ދައްކަވަމުން މިނިސްޓަރ ޝިޔާމު ވިދާޅުވީ ރައީސް މުޢިއްޒުގެ ވެރިކަމުގެ ފުރަތަމަ އަހަރު ވެގެން ދިޔައީ މާލީ ގޮތުން އެކިގޮތްގޮތުން ދަތި އުނދަގޫތަކާއި ކުރިމަތިވި އަހަރެއް ކަމަށެވެ. އެހެންނަމަވެސް، ވެރިކަމުގެ މިހާ ހިސާބަށް އައިސްފައި ވާއިރުވެސް ފައިސާ ޗާޕު ނުކޮށް، ވަޒީފާވެރިންނަށް މުސާރަދީ، ތަރައްގީގެ މަޝްރޫއުތައް ފަށައިގަތުމުގައި ކާމިޔާބުވެފައިވާ ކަމަށް ފާހަގަކުރެއްވިއެވެ.
މީގެ އިތުރުން، ރައީސް މުޢިއްޒު ރައްތިތުންނަށް ބޭނުންވެފައިވާ ކަންކަން ފޯރުކޮށްދިނުމަށް ވައުދުވެވަޑައިގެންފައި ވަނީ އެކަންކަން ކޮށްދެވޭނެތީ ކަމަށް ވެސް މިނިސްޓަރ ޝިޔާމު ވިދާޅުވިއެވެ. އެގޮތުން އިއްޔެ ހިންގެވި ކެބިނެޓް ވޯކިން ސެޝަނުގައި، މިހާރު ކުރިއަށް ގެންދަމުންދާ މަޝްރޫއުތައް ބާރުކުރާނެ ގޮތުގެ މަޝްވަރާތައް ކުރެއްވައި ތަރުތީބު ކުރައްވައިފައި ވާނެ ކަމަށް ވެސް ވިދާޅުވިއެވެ. އަދި ހަމަ އެހެންމެ، 2025 އަކީ ރައީސް މުޢިއްޒުގެ ސަރުކާރުގައި އަދާހަމައަށް އެންމެ ގިނަ ޕްރޮޖެކްޓް ހިންގާނެ އަހަރެއްކަމަށް ރައީސް މުޢިއްޒު ބުނެދެއްވި ކަމަށެވެ.
"މި އަހަރަކީ ރައީސް ޑރ. މުހައްމަދު މުޢިއްޒުގެ ސަރުކާރުގެ އެންމެ ގިނަ ޕްރޮޖެކްޓް އެއްފަހަރާ ހިނގާނެ އަހަރުކަން އަޅުގަނޑަށް މިއަދުވެސް ބުނެދިން. ދެ ހާހަށް ވުރެ ގިނަ ޕްރޮޖެކްޓް އަޅުގަނޑުމެން ގުނާލީމަ މި އަހަރު އެކަނި އެއްފަހަރާ ރާއްޖޭގެ އެކި ސަރަހައްދުތަކުގައި ކުރިއަށްދާނެކަން އަޅުގަނޑުމެންނަށް ޔަގީންވެގެން މިއަދުވެސް ދިޔައީ" ޝިޔާމް ވިދާޅުވިއެވެ.
މީގެ އިތުރުން މިނިސްޓަރ ޝިޔާމް ވިދާޅުވީ، ރާއްޖެއަށް ތަރައްގީ ގެންނެވުމުގައި ރައީސް މުޢިއްޒު ކާމިޔާބުވެވަޑައިގެންފައި ވަނީ، އެމަނިކުފާނަށް ނަގަން ޖެހިވަޑައިގަންނަވާ އުދަނގޫ ޑިސިޝަންތައް ނެންގެވުމަށް އެމަނިކުފާނު ކެރިވަޑައިގަންނަވާތީ ކަމަށެވެ. އަދި މިގޮތުން ގެނެސްދެއްވި ބަދަލު ތަކުގެ ސަބަބުން އިގްތިސާދީ ގޮތުން ދިމާވި އުނދަގޫ ހާލަތުން އަރައިގަނެ އިގްތިސާދު މިއަދު ކޮޅަށްގެހިފައިވާ ކަމަށް ވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
