މާލޭގެ ސަލްމާން މިސްކިތުގައި މިރޭ އިމާމްވެ ނަމާދުކުރައްވަން މަސްޖިދުއްނަބަވީގެ އިމާމު ފަޟީހަތުއްޝައިޚް ޑރ. ޞަލާޙުލް ބުދައިރު ހަމަޖެހިފައިވާ ކަމަށް އިސްލާމީކަންކަމާ ބެހޭ ވުޒާރާއިން ބުނެފިއެވެ. 

އިމާމް ބުދައިރު އިމާމުވެ ކުރެއްވުމަށް ހަމަޖެހިފައިވަނީ މަޣްރިބު ނަމާދާއި އިޝާ ނަމާދެވެ.

އަދި މިއީ އެމަނިކުފާނު ރާއްޖެއަށް ކުރެއްވި ރަސްމީ ދަތުރުފުޅުގައި އިމާމުވެ ނަމާދުކުރައްވާ ފުރަތަމަ ފަހަރެވެ.

Advertisement

މީގެ އިތުރުން މާދަމާ ރޭ ވެސް އިމާމު ބުދައިރު އިމާމުވެ އިޝާ ނަމާދު ކުރައްވާނޭ ކަމަށާއި، އިޝާ ނަމާދު ފަހުން އިސްލާމީ މަރުކަޒިގައި ޚާއްސަ ދަރުސެއް ދިނުމަށް ނިންމާފައިވާ ކަމަށްވެސް މި ވުޒާރާއިން ހާމަކޮށްފައިވެއެވެ. 

މި ހަފުތާ ހޯމަ ދުވަހު އިމާމު ބުދައިރު ރާއްޖެ ވަޑައިގެންފައިވާ އިރު، އިއްޔެ އެމަނިކުފާނު ވަނީ ރައިސުލްޖުމްހޫރިއްޔާ ޑރ. މުހައްމަދު މުޢިއްޒުގެ އަރިހަށް ޒިޔާރާތްކުރައްވާފައެވެ. އަދި އިސްލާމީކަންކަމާ ބެހޭ ވުޒާރާގެ އިސްވެރިންނާއި ބައްދަލުކުރައްވައި، ހުކުރު މިސްކިތަށް ވެސް ވަޑައިގެންނެވިއެވެ.