އިޒްރޭލު ޕާސްޕޯޓުގައި ރާއްޖެއަށް ފަތުރުވެރިން އައުން މަނާކުރަން ނިންމި ނިންމުމުގެ ސަބަބުން ފަތުރުވެރިކަމުގެ ސިނާއަތައް ގެއްލުމެއްވަމުން ނުދާ ކަމަށް ޓޫރިޒަމް މިނިސްޓަރު ތޯރިގް އިބްރާހިމް ވިދާޅުވެއްޖެ އެވެ.
އިމިގްރޭޝަނުގެ ގާނޫނަށް މި އިސްލާހު ގެނެސްފައިވަނީ މި މަހު 15 ވަނަ ދުވަހު އެވެ. އެ ދުވަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ އިސްލާހު ތަސްދީގު ކުރައްވާފަ އެވެ.
އިޒްރޭލުގެ ޕާސްޕޯޓު ބޭންކުރިކަން އަންގައި އެ ދުވަހު އިމިގްރޭޝަނުން ވެސް ވަނީ ޓްރެވެލް އެޑްވައިޒަރީއެއް ނެރެފަ އެވެ.
ރައީސް އޮފީހުގައި މިއަދު ބޭއްވި ބައްދަލުވުމުގައި ވާހަކަދައްކަވަމުން މިނިސްޓަރު ތޯރިގް ވިދާޅުވީ އިޒްރޭލު ޕާސްޕޯޓު މަނާކުރުމުގެ ސަބަބުން ރާއްޖެ ބޮއިކޮޓް ކުރުމަށް ގޮވާލާ ފަދަ ކެމްޕޭންތަކެއް ކުރިއަށް ނުދާ ކަމަށެވެ. އަދި އެއާ ހިލާފަށް ގިނަ ބަޔަކު އަންނަނީ އެ ނިންމުމަށް ތާއީދުކޮށް ތައުރީފު ކުރަމުން ކަމަށް މިނިސްޓަރު ވިދާޅުވި އެވެ.
ރާއްޖެ އަށް އަންނަ ފަތުރުވެރިންގެ އަދަދުތަކާއި މައުލޫމާތުތައް ބަލަމުންދާ ކަމަށް ވެސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
