ރޭ ފަތިހުގެ ވަގުތެއްގައި ކ. ގުރައިދޫގައި ސައިކަލެއް ރޯކޮށްލި މައްސަލަ ފުލުހުން ތަހުގީގު ކުރަން ފަށައިފިއެވެ. 

ރޯކޮށްލި ސައިކަލުގެ ވެރިފަރާތުން ވޮއިސްއަށް މައުލޫމާތު ދީފައިވާ ގޮތުން، އެންމެ ފަހުން ސައިކަލު ފެނިފައިވަނީ ރޭ ދަންވަރު 2 ޖަހާކަށް ހާއިރެވެ. އަދި ސައިކަލު ރޯކޮށްލާފައިވަނީ ފަޅުގެއަކަށް ގެންދިޔުމަށްފަހުގައި ކަމަށާއި، ސައިކަލު ގެންގޮސްފައި ވަނީ އެއްވެސް ސީސީޓީވީ ކެމެރާއަކަށް ނާރާނެހެން ކަމަށް ވެސް ބުނެފައި ވެއެވެ. 

ސައިކަލު ރޯކޮށްލި ކަން އެނގިފައިވަނީ ރޭ 3 ޖަހާކަށް ހާއިރު ސައިކަލު ރޯކޮށްލުމުން އެ ސަރަހައްދު ގޭގޭގައި އުޅޭ މީހުންނަށް ބާރު އަޑުތަކެއް އިވުމުންކަމަށް ވެސް ސައިކަލުގެ ވެރިފަރާތުން ބުންޏެވެ.

އަދި 03:45 ހާކަހާއިރު ފުލުހުންނަށް އެފަރާތުން ގުޅުމާއެކު ވަރަށް އަވަހަށް ރެސްޕޮންސް ލިބިފައިވާކަމަށް ވެސް ފާހަގަކުރިއެވެ. 

މީގެ އިތުރުން މިހާރު ސައިކަލު ރޯކޮށްލި ފަޅުގެ ވަށައިގެން ޕޮލިސް ޓޭޕު ދަމައިފައިވާ ކަމަށާއި، އެކަން ތަހުގީގު ކުރުމަށް މަސައްކަތް ކުރަމުންދާ ކަމަށް ވެސް އެފަރާތުން މައުލޫމާތުދީފައި ވެއެވެ.

އަދި މިއަދު މާލެއިން ފޮރެންސިކް ޓީމެއް އެ ރަށަށް ދިޔުމަށް ހަމަޖެހިފައިވާ ކަމަށް ވެސް ބުނެފައިވެއެވެ. 

މިހާތަނަށް އަދި މި މައްސަލައިގައި މީހަކު ހައްޔަރެއް ނުކުރެއެވެ.