އީރާނުގެ އެންމެބޮޑު އެއް ބަނދަރުކަމަށްވާ އައްބާސް ޕޯޓްގައި ބާރުގަދަ ގޮވުމެއް ގޮވައި 5 މީހަކު މަރުވެ އެތައް ބަޔަކު ޒަހަމްވެއްޖެއެވެ.

އީރާނުގެ މީޑިއާތަކުން ބުނާގޮތުގައި އައްބާސް ޕޯޓްގައި މި ގޮވުން ގޮވާފައިވަނީ ޕޯޓްގައިހުރި ނުރައްކާތެރި ކެމިކަލްތަކެއްގައި ރޯވެގެންކަމަށް ލަފާކުރެވޭ ކަމަށެވެ. މި ހާދިސާގައި 700 އަށްވުރެ ގިނަ މީހުން ޒަހަމްވެފައިވާކަމަށް އެޤައުމުގެ މީޑިއާތަކުން ބުންޏެވެ.

އީރާނުގެ ޤައުމީ ޓީވީން ބުނެފައިވަނީ، މި ހާދިސާ ހިނގާފައިވަނީ، ކެމިކަލްތަކެއްގައި ރޯވެގެން ކަމަށާއި، އެ ހާދިސާ ހިނގާފައިވަނީ އެ ކެމިކަލްތައް ރައްކާތެރިގޮތުގައި ބެހެއްޓުމަށް ކަމާބެހޭ އިދާރާތަކުން މީގެކުރިން އިންޒާރުވެސް ދީފައިވަނިކޮށެވެ. އައްބާސް ބަނދަރު ހުންނަނީ އީރާންގެ ވެރިރަށް ތެހެރާނާ 1،000 ކިލޯމީޓަރުގެ ދުރުމިނެއްގައެވެ. 

Advertisement

އީރާނުގެ އައްބާސް ބަނދަރުގައި ހިނގި ހާދިސާ.. ފޮޓޯ: އީރާން ޓްޑޭ

އައްބާސް ބަނދަރުގައި ހިނގި މިހާދިސާގައި ގޮވުން ގޮވި ސަރަހައްދުގެ އިތުރުން ކައިރި ހިސާބުތަކަށް ވަނީ ގޮވުމުގެ އަސަރު ވަރަށްބޮޑަށް ކޮށްފައެވެ. ނަމަވެސް ގޮވުމުގެ އަސަރުކުރި ދުރުހިސާބުތަކަށް މާބޮޑެތި ގެއްލުންތައް ވެފައި ނުވާކަމަށް މައުލޫމާތު ލިބެއެވެ. މި ހާދިސާއާ ހިނގާފައިމިވަނީ އީރާނުގެ ނިއުކްލިއާ މައްސަލާގައި އޮމާންގެ ވެރިރަށް މަސްކަޓްގައި އެމެރިކާ އާއި އިރާން ނުސީދާ ވާހަކަތަކެއް ބާއްވަމުންދަނިކޮށެވެ. މި ވާހަކަތަކުގެ މެދުވެރިއެއްގެ ބައި އަދާކުރަނީ އޮމާނުންނެވެ.

ބަނދަރުގައި ހިނގާދިޔަ މި ހާދިސާއާ ގުޅޭގޮތުން އެންމެފުރަތަމަ ވާހަކަ ދައްކާފައިވަނީ އިސްރާއީލުންނެވެ. އިސްރާއީލަށް ވާގިވެރިވާ ބައެއް މީޑިއާތަކުން ބުނެފައިވަނީ، އައްބާސް ބަނދަރުގައި މިއަދު ހިނގާދިޔަ އެ ހާދިސާއާ އިސްރާއީލާ އެއްވެސް ގުޅުމެއް ނުވާކަމަށެވެ.