ސަލްޓަން ޕާކު ބަލެހެއްޓުމުގެ މަސައްކަތް ހައުސިން މިނިސްޓްރީގެ ދަށަށް ބަދަލުކުރި ފަހުން އެތަން ސާފުކޮށް ބެލެހެއްޓުމާއި އެތަން ތަރައްގީ ކުރުމުގެ މަސައްކަތް ކުރަމުންދާ ކަމަށް ހައުސިން މިނިސްޓަރ ޑރ. އަބްދުﷲ މުއްތަލިބް ވިދާޅުވެއްޖެ އެވެ.
މާލެ ސިޓީ ކައުންސިލުން މިދިިޔަ އަހަރު ފެށުނުކޮޅު ވަނީ މި ޕާކު މަރާމާތުކުރުމަށްޓަކާ ޕާކުގެ ބައެއް ސަރަހައްދުތައް ބަންދުކޮށްފައެވެ. އޭގެ ފަހުން އެތަނުގެ މަސައްކަތް ވަނީ ހުއްޓިފައެވެ.
އެހެންނަމަވެސް، ހައުސިން މިނިސްޓްރީގެ އެދުމުގެ ދަށުން މާލެ ސިޓީ ކައުންސިލުން އެ ޕާކުގެ މަސައްކަތްތައް ބެލެހެއްޓުމަށް ހައުސިން މިނިސްޓްރީގެ ދަށަށް ފެބްރުއަރީ މަހު 19 ވަނަ ދުވަހު ބަދަލުކޮށްފައެވެ.
ހައުސިން މިނިސްޓަރ ވިދާޅުވާ ގޮތުން ޕާކު ބެލެހެއްޓުމުގެ މަސައްކަތް ހައުސިން މިނިސްޓްރީއަށް ބަދަލު ކުރުމަށް އެދިފައިވަނީ ސަލްޓަން ޕާކުގެ ގިނަ ސަރަހައްދުތަކެއް ގިނަ ދުވަސްތަކަކަށް ބަންދުކޮށްފައި ވުމުންކަމަށާއި، އެތަން ވީރާނަވެ، މަދިރި އުފެދޭނެގޮތަށް ދޫކޮށްލާފައި ވުމުގެ އިތުރުން، ކުށްކުރާ ފަރާތްތަކުން ބޭނުންކުރަން ފަށާފައިވާ ތަނަކަށް ވެފައިވާތީ ކަމަށެވެ. އަދި މިދިޔަ ދެ މަސް ދުވަސް ތެރޭގައި ޕާކު ސާފުކުރުމާއި ތަރައްގީކުރުމުގެ މަސައްކަތް ކުރިއަށް ގެންދަމުންދާ ކަމަށް ވެސް މިނިސްޓަރ ވިދާޅުވިއެވެ.
އޭގެ އިތުރުން، ޕާކުގެ ޑިވެލޮޕްމަންޓް ޕްލޭން ފައިނަލްކުރެވި ބަންދުކޮށްފައިވާ ސަރަހައްދުތައް ތަރައްގީކުރުމުގެ މަސައްކަތްތައް ވަރަށް އަވަހަށް ފެށިގެންދާނެކަމަށް ވެސް މިނިސްޓަރ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
