މެލޭޝިއާގައި ދިވެހިރާއްޖޭގެ ޕާސްޕޯޓާއި އައިޑީކާޑު ޕްރިންޓުކުރުމާއި ދޫކުރުމުގެ ހިދުމަތްތައް ގާއިމުކުރުމަށް މަސައްކަތްކުރައްވަމުންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރަސްމީ ދަތުރުފުޅެއްގައި މެލޭޝިޔާއަށް ވަޑައިގަތުމުގެ ކުރިން މިއަދު ދެއްވި އިންޓަވިއުއެއްގައި ރައީސް ޑރ. މުޢިއްޒު ވިދާޅުވެފައިވަނީ މެލޭޝިޔާގައި ދިރިއުޅޭ ދިވެހިންނަށް ކަންކަން ފަހިކޮށްދެއްވުމުގެ ގޮތުން ޕާސްޕޯޓާއި އައިޑީކާޑު ހެއްދުމުގެ ހިދުމަތްތައް ފޯރުކޮށްދެވޭނެ މަގު ފަހި ކުރުމަށް މެލޭޝިޔާ ސަރުކާރުގެ އިސްވެރިންނާއި މަޝްވަރާކުރާނެ ކަމަށެވެ.
އަދި މެލޭޝިޔާގައި ދިއިރުޅޭ ދިވެހިންނާ ބައްދަލުކުރައްވައި، ސަރުކާރުގެ ތެރެއިން ކަންކަން ފަހި ކޮށްދެއްވުމަށްޓަކައި މަސައްކަތްކުރައްވާނެކަމަށްވެސް އެމަނިކުފާނު ވިދާޅުވިއެވެ.
މެލޭޝިޔާއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި ކުރައްވާ ދަތުރުފުޅަކީ ދެ ޤައުމުގެ ދެމެދުގައިވާ ޒަމާންވީ ބަދަހި ގުޅުން އިތުރަށް ހަރުދަނާކުރެއްވުމާއި ދެ ޤައުމުގެ ލީޑަރުންގެ ހާޒިރުގައި މުހިންމު ދާއިރާތަކުން އެއްބާރުލުންދިނުމާ ގުޅުންހުރި ފަހުމުނާމާތަކުގައި ސޮއިކުރައްވައި، ނޯޓް އެކްސްޗޭންޖްތައް ކުރިއަށްގެންދިއުމަށް ކުރައްވާ ރަސްމީ ދަތުރުފުޅެކެވެ.
އަދި މި ދަތުރުފުޅުގައި އެ މަނިކުފާނުގެ އަރިހުގައި ވަޒީރުންގެ މަޖިލީހުގެ މެންބަރުންނާއި ސަރުކާރުގެ އިސްވެރިންގެ ވަފުދެއް ވަނީ ބައިވެރިވެވަޑައިގެންފައެވެ.
Advertisement
This content is created and paid for by advertisers and does not involve Voice Journalists
