ވަގަށް ރާއްޖެ އެތެރެކުރަން އުޅުނު 13 މިލިއަނަށް ވުރެ ގިނަ ސިނގިރޭޓު މޯލްޑިވްސް ކަސްޓަމުން ރޭ އަތުލައިގަނެފިއެވެ.
ސިނގިރޭޓު ފޮށިތައް ފެނުނީ ޕުލައިވުޑް ޝިޕްމެންޓެއްގައި އެ ތަކެތި ވަގަށް އެތެރެކުރަން އުޅޭ ކަމުގެ މައުލޫމާތު ލިބިގެން ހުޅުމާލެ ސީ-ކާގޯ ޓާމިނަލުގައި ހިންގި އޮޕަރޭޝަނެއްގައި ކަމަށް ކަސްޓަމުން މިއަދު ބުންޏެވެ.
އެކޮންޓެއިނަރުތައް ބަލައި ފާސްކޮށް އޭގެ ތެރެއިން 40 ފޫޓުގެ 2 ކޮންޓެއިނަަރުން 360 ކޭސް ސިނގިރޭޓު ފެނިފައިވާ ކަމަށް ކަސްޓަމުން މައުލޫމާތު ދެއެވެ. އެއީ ޖުމްލަ 13،600،000 ސިނގިރޭޓު ސްޓިކެވެ.
މި ސިނގިރޭޓްތައް އެތެރެކުރި ބައެއް ކަސްޓަމުން ހާމަކޮށްފައެއް ނުވެއެވެ.
ކަސްޓަމުން ބުނީ، އަތުލައިގަތް ބްރޭންޑުތަކުގެ ސިނގިރޭޓަށް އާއްމުކޮށް ކަނޑައަޅާފައިވާ އަގުތަކުން ޑިއުޓީ ދައްކާއިރު، 13.6 މިލިއަން ސިނގިރޭޓަށް 122 މިލިއަން ރުފިޔާ އަރާނެ ކަމަށެވެ.
ޤަވައިދާ ޚިލާފަށް ސިނގިރޭޓް ރާއްޖެ އެތެރެކުރުމަށް މަސައްކަތް ކުރުމަކީ މިހާރު ވަރަށް އާންމުކަމެކެވެ. މިދިޔަ ހަފްތާގެ ބުރާސްފަތި ދުވަހުވެސް ކަސްޓަމުން ވަނީ ކ. ދޫނިދޫގައި ގާނޫނާއި ޚިލާފަށް އެތެރެކުރަން އުޅުމުގެ ތެރޭގައި ކަސްޓަމްސްއިން އަތުލައިގަނެފައިވާ 1 މިލިއަނަށްވުރެ ގިނަ ސިނގިރޭޓް ނައްތާލައިފައެވެ.
Advertisement
This content is created and paid for by advertisers and does not involve Voice Journalists
