މެންދުރުގެ ގަދަ އަވީގައި މާލޭގެ މަގުމަތީގައި ގާތައް ނަގައި، މަގު ހެދުމުގެ ބުރަ މަސައްކަތުގައި އުޅުނު މާލެ ސިޓީ ކައުންސިލްގެ މުވައްޒަފުންނަށް، ކުޑަކުދިންތަކެއް ދިން ހަދިޔާއަކުން ގިނަ ބައެއްގެ ތައުރީފް އޮހެން ފަށައިފިއެވެ. 

މިއަދު މީސްމީޑިއާގައި ދައުރުވި ވީޑިއޯއަކުން ފެންނަނީ، "އެއަރކޫލް" ގެ ލޯބިލޯބި ކުދިންތަކެއް ނުކުމެ، ވަރުބަލިކަމެއް ނެތި މަސައްކަތްކުރަމުންދިޔަ މާލެ ސިޓީ ކައުންސިލްގެ މުވައްޒަފުންތަކަކަށް ޖޫހާއި ފެން ބަހަމުންދިޔަ ހިތްގައިމު އަދި އުފާވެރި މަންޒަރެވެ.

މި ވީޑިއޯ ހިއްސާކުރި ފަރާތުން ލިޔެފައިވާ ކެޕްޝަންގައި ބުނެފައިވަނީ، މިއީ އެ ކުދިންގެ ފަރާތުން ފެނިގެންދިޔަ ނުހަނު ލޯބިވެތި އަދި ރީތި ނަމޫނާއެއް ކަމަށެވެ.

އަދި މިފަދަ ބުރަ މަސައްކަތް ކުރާ ފަރާަތްތަކަށް އަޅާލައި، އެކަން ބަލައިގަންނަ މީހުން މަދު މިފަދަ ޒަމާނެއްގައި މި ކުދިން އިޚްތިޔާރުކުރީ އެ ބުރަ މަސައްކަތްތެރިންގެ އިހުސާސްތައް ދެނެގަތުން ކަންވެސް ފާހަގަކޮށްފައިވެއެވެ.

”އެކުދިން ޚިޔާރުކުރީ އަހަރެމެންގެ މަގުތައް ހަދައި، ރަށް ޒީނަތްތެރިކުރުމުގައި ދާ އޮހޮރުވާ، އަހަރުމެން އެބައެއްގެ މަތީން ފަސޭހައިން ހަނދާންނެތޭ މަސައްކަތްތެރިންގެ އަގު ވަޒަންކުރަން.“ އެމީހާ ލިޔެފައިވެއެވެ.

”އެ ކުދިން އެ މީހުންނަށް ދިނީ ހަމައެކަނި ފެނާއި ޖޫސް ތައްޓެއް ނޫން. އެއާއެކު ދިނީ ޤަދަރާއި، ލޯތްބާއި، އޯގާތެރިކަން. އެ ކުދިކުދި އަތްތަކުން،  ބޮޑު ހިތަކާއެކު އެ ހަނދާންކޮށްދިނީ އިންސާނިއްޔަތުކަން އަދިވެސް ދިރިހުރިކަން“ އެމީހާ އިތުރަށް  ބުނެފައިވެއެވެ. 

މިއީ ބުރަ މަސައްކަތްކުރާ ކޮންމެ މުވައްޒަފަކަށްވެސް ލިބުނު ބޮޑު ހިތްވަރެއްކަން ޔަގީނެވެ.

ދަންނަ މީހުންނަށާއި، ނުދަންނަ މީހުންނަށްވެސް އަޅާލައި، އޯގާތެރިވުމުގެ މިފަދަ ރިވެތި އާދަ ތަކަކީ އިހު ޒަމާނުގައި ދިވެހިންގެ ތެރޭގައި އާއްމު ކަމެއް ނަމަވެސް މި ޒަމާނުގައި މަދުން ނޫނީ ނުފެންނަ ކަމެކެވެ. މި މުޖުތަމަޢުގެ ގިނަ ބަޔަކު ހަނދާންނެތިފައިވާ މިފަދަ ކަންކަން، މި ކުދިން މިއަދު އަަޅުގަނޑުމެންނަށް އެ ދަސްކޮށްދިނީ އަމަލީ ގޮތުންނެވެ. އެކުދިން އެ ދައްކުވައިދިނީ ހަގީގީ ކުުލުނާއި އޯގާތެރިކަމަކީ ކޮބައިކަމެވެ.